陳凱琳父母監場 捱摑落淚
應屆港姐冠軍陳凱琳首次拍劇就留下陰影，因首日開廠就狂超時，令在家中等候的陳媽媽擔心久未回家的女兒有危險，每隔兩小時就一次「追魂Call」，她又透露早前拍一場掌摑戲令她痛到流淚，故昨日陳爸媽一同探班，實行（目及）實寶貝女！
藝人關菊英、陳凱琳（Grace）、陳國邦昨日為劇集《商戰》到中環取景，首次拍劇的Grace笑言首日開廠便留下陰影：「個通告話拍到凌晨2點半，但點知over晒，最後我6點先返到屋企。」她表示母親當晚在家等她收工，但見她遲遲未歸就十分緊張：「佢擔心我有咩事，之後佢每隔兩個鐘就打嚟問我幾時返。（你NG太多？）唔係，我得一兩句對白好簡單，只係廠景set機好耐，同埋中間要穿插拍其他人嘅戲份。」
她又透露早前拍了被人掌摑的場口，她笑言為了不用被掌摑多次，故跟對手夾定了真打：「我仲叫佢落力咁打，最後一take過完成。（痛？）好痛呀，我從來未試過咁樣畀人打，媽咪都未咁樣打過我，我之後照鏡見到自己有啲眼淚流咗出嚟。」
菊姐出動私伙
而跟Grace演母女的關菊英亦大讚對方聰明醒目：「真係美貌與智慧並重，我第一日同佢拍嗰時見佢已經好快上手，好smart！」已有3年冇拍劇的菊姐透露出動私伙拍攝：「公司啲衫都唔多，都會預備衫、手袋、首飾，盡量配合角色。」將於下星期六生日的她笑言屆時如不用開工就跟家人食餐慶祝，問到同性密友周偉利會否有驚喜給她時，她大方笑說：「話明係surprise又點會知呢，到時先算啦。（想收咩禮物？）禮物都係其次，冇乜所謂，活到我呢個年紀最緊要就係我同家人都開心和健康。」
陳國邦被教訓
另外，陳國邦就透露較早前已跟黎耀祥拍了一場爭執戲份：「我仲摑咗祥仔後尾枕一嘢，所以依家就拍我畀家姐關菊英喺架車向我訓話。」談到Grace與他有甚多對手戲，他笑言暫時未能給任何評語：「因為同佢只係拍咗一場戲，不過佢好好學，會問我好多嘢。」
文：影視組