張家輝爛面喪屍 燒埋身

剛憑《激戰》奪金像獎「最佳男主角」的張家輝，在接拍英皇新片《魔警》時，向導演林超賢事先聲明不做肌肉人：「我同導演講，不如今次玩吓第二啲嘢啦，我可以去到好盡，只要唔使再練大隻，乜都得！跟住導演就笑住咁講，不如試吓放火燒你吖！當初以為佢講笑啫，點知原來嚟真。」拍攝時林超賢更「威脅」家輝：「衝入火場，燒到甩皮甩骨先好出嚟！」

每次化妝四小時

這場戲講述家輝被人放火尋仇，為救母親不惜衝入火場，結果活生生燒死。林超賢向來認真，拍攝現場用上真火，搞到所有工作人員大汗疊細汗之餘，家輝更要受皮肉之苦。為了營造真實的燒傷效果，家輝每次拍攝都花四小時化妝，呈現出皮開肉裂、爛面毀容的效果，猶如喪屍一樣。家輝亦指落完妝仍覺得面頰「乸住乸住」，他謂：「其實化妝嗰陣都冇乜嘢，只係唔郁得喺度等，都仲OK。不過落妝嗰陣就麻煩好多，搞成個幾鐘！因為啲假皮係用膠水貼上去，要用特別卸妝水先抹得走，但抹完之後成塊臉『乸住乸住』，一個個紅印，返屋企洗幾多次臉都唔得。」

放大圖片	家輝被燒至皮開肉裂的妝容，非常嚇人，每次化妝都要四小時。	放大圖片

睇好吳彥祖稱帝

搏到咁，下年金像獎隨時再下一城，但家輝就謙虛笑言：「其實近幾年出席過唔少頒獎禮，有贏過，亦都有輸過，我諗作為演員最重要並唔係攞獎，而係喺事業上有冇突破，可唔可以帶畀觀眾新鮮感。」他反而睇好拍檔吳彥祖有機會稱帝！

文：影視組