栢芝小三匿衣櫃焗睇正印調情
戀愛經驗豐富的張栢芝，在昨日凌晨播出的電台錄音訪問中分享情史，還自爆曾做小三，當時被迫匿入衣櫃看着男友與正印溫馨，如此慘痛的初戀，令栢芝從此情迷成熟男，可惜至今仍未修成正果，難怪她說：「雖然慣咗單身，但我都會寂寞。」
張栢芝在昨日凌晨播出的電台訪問中，講到第一次分手經歷，她自爆慘遭拍拖三年的男友屈做狐狸精，更要匿入衣櫃避風頭，她憶述：「嗰時喺澳洲讀書，佢女友上嚟鐘，佢即刻推我入衣櫃。原來佢呃咗我三年，我被騙做咗狐狸精，冤枉地做咗第三者，十足梁漢文首歌，『躲於衣櫃裏』。」
「至愛係自己」
栢芝續說：「我唔出嚟，係唔想傷害個女仔，我已經夠慘，畀個女仔見到我都會好慘，我仲要喺衣櫃入面睇住佢哋情情塔塔成個半鐘，差啲瞓着，我好傷心，但唔會鎅手。」
之後主持以陳小春作例子，指男人唔玩過唔會定性，栢芝深感認同，並曲線自讚：「邊有貓唔食魚？男女都好，後生玩過晒，大個成熟先係極品，好彩我後生都好曳。」問成熟男是否栢芝那杯茶？她坦言：「雖然慣咗單身，但我都會寂寞，想搵個40至43歲，靚仔已經吸引唔到我。」她又笑指之前的外籍男友及前緋聞男友鄭中基都不算靚仔。問栢芝何時會找到一生至愛？她酸溜溜說：「至愛係自己，有至愛就冇人離婚啦。」
教男士揀女友
訪問尾聲，栢芝呼籲男士切勿貪圖年輕貌美的女子：「你睇吓劉嘉玲、鍾楚紅、林青霞，幾有自信，又有女人味，贏晒啲o靚妹。後生女識氹你，都係想買手袋。」
文：音樂組