曉明單挑碧咸 張腿晒雄風
內地小生黃曉明最近變身「肌男」拍了一輯噴血廣告照，只穿內褲上陣的曉明大晒冷，毫不吝嗇地晒盡胸肌、腹肌和臂肌等十多舊肌肉，其中一張臥床甫士竟跟「萬人迷」球星碧咸的內褲廣告照如出一轍，單靠雙腿微張的「鵰」蟲小技，足已令粉絲瘋狂尖叫！
近期娛圈掀起一陣大隻佬熱潮，不少男星都「肌」渴不已，內地男星黃曉明亦唔執輸，為某品牌拍攝一輯內褲廣告時就乘「肌」大展雄風，盡騷其完美激凸身材，除了脹卜卜的胸肌和臂肌外，最煞食的莫過於一排特大朱古力！結實的八舊腹肌經已令一眾女士猛吞口水，加上貼身的內褲令他雄風盡現，相信無女性能抵擋「曉明誘惑」！
封新一代「亞洲男神」
有網民更幫曉明衝出亞洲，將他媲美也曾拍內褲廣告的萬人迷碧咸，兩人臥床腿張開的甫士有九成相似，曉明的爆肌程度亦不亞於碧咸，獲封為新一代「亞洲爆肌男神」絕對當之無愧。至於「台灣第一名模」林志玲亦有為同品牌的女士內衣系列拍廣告，盡騷美好身材。
張繼聰狂健身搵銀
至於香港代表就有張繼聰，去年開始密密健身的他在最新代言廣告中亦大晒肌肉，零脂肪身形原來全靠老婆謝安琪幫手打造，他說：「每日至少都要操3個鐘，又要戒口，太太都體諒我唔可以成日出街食飯，又會搵啲健康材料煮嘢畀我食。」囝囝不時出口術氹他，原來亦是張繼聰的動力來源，他笑說：「個仔成日鼓勵我同刺激我，出街時見到唔着衫嗰啲人會同我講『爸爸你大隻過佢』，有時又會講『爸爸你可唔可以好似佢咁大隻』，成個人即刻冧晒！」
文：音樂組