鮑姐破格演繹 輸獎無憾
鮑起靜（鮑姐）憑《殭屍》再度入圍金像獎角逐「最佳女主角」，火併好戲之人湯唯及「章八后」子怡。鹿死誰手仍是未知之數，鮑姐卻謙稱自己已打定輸數，推舉子怡成影后「不二之選」。一向害怕接觸靈異題材電影的她，今次破格演出，有感已為自己寫下一張漂亮成績單，無怨無悔。
「第33屆香港電影金像獎」5位入圍準影后中，論吸引力非憑《一代宗師》八度封后的章子怡莫屬，湯唯於《北京遇上西雅圖》的拜金女形象亦入型入格。鮑姐於《殭》片戲份不算太重，她坦言對於應該入圍「女主角」或「女配角」，亦很難有清晰界線及定位，更有資深影人曾私底下向她說：「如果係『女配』嘅話，你根本冇得輸。」
完全冇壓力
談到自己「踩界入圍」的勝算，鮑姐覺得所謂的輸贏，其實不太重要：「我老公（方平）話，人生能夠有幾多次入圍女主角吖，入到圍已經係一次紀錄。佢平時對我要求高，唔會開聲讚我，但今次佢都話我做得好，再加上走在街上，多咗好多年輕觀眾叫我，拉近咗我同大家嘅距離，我覺得得着好多嘞。」
對於勁敵章子怡，鮑姐謙稱：「佢得三個字，就係『冇得輸』嘞。我同顏卓靈兩個反而冇乜壓力，日前見到面仲互相擁抱祝賀，不過我反對用『陪跑』兩個字嚟形容我哋，我覺得自己今次寫咗張好靚嘅成績表，咁樣已經好滿足嘞。」
曾婉拒拍攝
鮑姐坦言接到《殭》片劇本之初曾打算婉拒：「我怕啲靈異題材電影，又驚咁深沉嘅角色，拍完之後好難抽離，不過Juno（導演麥浚龍）再約我出嚟傾，佢講個故事大綱令我淚流滿臉，終於決定接拍，點知第1日開工見到吳耀漢個爛面造型倒模，仲要浸滿血水，嚇到我三魂唔見咗七魄，好彩後嚟睇住佢化妝，一筆一筆畫上去，先覺得成件事冇咁恐怖。」
雖然自覺今次再當上影后的機會很微，鮑姐仍落力挑選戰衣，準備出席頒獎禮撐場，以行動支持港產片，且開心直言與Juno已有下一步合作計劃：「詳情未講得住，但個角色好富挑戰性，係我從來未試過。」
第33屆香港金像獎 最佳女主角提名名單
章子怡《一代宗師》
湯唯《北京遇上西雅圖》
顏卓靈《狂舞派》
鄭秀文《盲探》
鮑起靜《殭屍》
文：影視組
攝：沈建程
場地：嵐喬