單紫寧晒億元鑽飾迎君再來
擅長演繹鄧麗君歌曲而成名的單紫寧，將於5月2至3日在伊館舉行《2014伊館君再來演唱會》，屆時會播放當年鄧麗君在伊館及於日本獲獎的珍貴片段，單紫寧又會出動億元鑽飾，以華麗造型閃耀舞台。
單紫寧下月在伊館的演唱會是獲鄧麗君文教基金會海外紀念鄧麗君演唱會的授權，提供鄧麗君於1982年在伊館演出的錄影片段。單紫寧謂：「到時會播番鄧小姐當時嘅風采，會見到佢喺伊館喊住多謝香港觀眾嘅感人場面，仲有佢喺日本攞獎片段同相片。」
伊館情意結
談到伊館，單紫寧說有情意結：「伊館係鄧小姐企過嘅舞台，我喺嗰度唱佢嘅歌，台下觀眾有可能睇過鄧小姐當年嘅伊館個唱，所以今次對我同觀眾都極具意義。我哋唔會濫用佢肖像，會恰到好處，同歌迷一齊懷念佢。」單紫寧亦遺憾未親身見過鄧麗君，但今次演出能得到文教基金授權，證明她多年來用心演唱是獲鄧家認同，如同鄧麗君鼓勵她。
為了今次個唱，單紫寧會勁晒天價行頭，她獲歐洲著名珠寶品牌贊助億元鑽飾，她謂：「為配合當晚五個造型，珠寶商出動咗五套鑽飾畀我襯衫，足足價值成億元，仲有八名保鏢喺現場駐守。」服裝方面，單紫寧指舞台上的鄧麗君一向很時尚很靚：「我嘅宗旨係追求鄧小姐神髓，唔會刻意模仿。」
捐部分歌酬
至於相隔三年再在港開騷，單紫寧稱期間到了各地演唱，包括美加、新加坡、馬來西亞及澳洲等地，現已進行逾200場表演。今次選擇五月在港開騷，除因是黃金周，亦是鄧麗君忌辰。單紫寧說今次歌酬會捐部分到鄧麗君文教基金會作慈善用途，以延續鄧麗君的行善助人精神。
珠寶贊助：MIIORI
文：音樂組