雨僑胸襲欣宜立威
鄭欣宜宣布加盟新公司，獲全公司上下到場支持，不過身為公司一姐的雨僑先行向欣宜立威，出動「胸」器示威之餘，又踩場為自家品牌賣廣告，難得女主角欣宜不介意風頭被搶，大方表示兩人形象有別。
鄭欣宜昨日舉行加盟蕭定一的中國3D數碼娛樂有限公司發布會，雨僑、莊思敏、張建聲等以師姐師兄身份到場祝賀，屬有料之人的欣宜雖以大Deep V長裙上陣，但並冇谷出事業線，明顯被晒胸又晒腿的雨僑比下去，雨僑更送上自家品牌的化妝掃做賀禮，乘機為自己賣廣告，向新加盟的欣宜擺師姐款。幸好欣宜亦有大師兄張智霖拍片撐腰，笑言要欣宜改口叫他做哥哥：「公司員工就好似一家人，所以唔好叫我做叔叔，叫哥哥。」
月尾孖張智霖開戲
雖然欣宜在風頭上先輸一仗，但她大方表示不擔心與雨僑、莊思敏等人爭資源：「我哋個個唔同形象，蕭生話唔會簽同一樣嘅人，大家會做唔同嘅嘢。」雨僑則否認有心搶鏡：「唔會啩，露一小部分啫，希望佢唔會咁諗。」
欣宜表示今次簽約年期不足5年，父親鄭少秋也支持她的決定，會向電影方面發展，月尾會和張智霖及周秀娜開戲：「我要扮MK妹，真係要花時間去學點做MK女，因為我好少去旺角。」
欣宜透露唱片公司仍在選擇中，對於有網民提議她與林二汶和鄧小巧組隊「Too Fat」，她笑言冇可能：「我一出道就獨立發展，唔會組組合。（介意身形畀人笑？）唔介意，係我特徵！」
文：音樂組