張家輝撇女撩吳彥祖再鬥
張家輝及吳彥祖昨晚出席英皇電影《魔警》亞洲首映禮，兩位型男直認唔夠喉望再度合作，家輝笑言想下次鬥戲鬥足一百場，寧可不近女色，於紅地氈上撇下思漩不顧。
《第38屆國際電影節》閉幕電影、英皇新片《魔警》昨晚在尖沙咀文化中心舉行亞洲首映禮，導演林超賢、演員張家輝、吳彥祖（Daniel）、思漩、吳浩康及廖啟智等齊以盛裝出席，他們大部分都穿黑色服裝，令身穿灰色衫的家輝最突出。至於女主角思漩身穿露背裝及騷事業線，並佩戴價值300萬元的英皇鑽飾，閃爆全場！
鬥足100場
家輝與思漩結伴出場時不停擺甫士，感覺猶如占士邦與邦女郎一樣，其後家輝留低思漩影單人照，仍是新人的她驚慌叫道：「唔好啦！」但最後仍被家輝「狠心」丟低，場面頗搞笑！台上的Daniel表示早已希望跟家輝合作，豈料今次只得兩場對手戲，其中一場被家輝看着，已令他大為緊張。其後家輝受訪時表示首次與Daniel合作，大讚對方是好演員，很認真對待角色，亦覺得唔夠喉：「睇劇本嗰陣未知會係點，拍完都想再合作，下次鬥足100場啦！」他笑言想跟Daniel拍一套《美魔男之手足情未了》，問到是否認美男子？他笑說：「好難講o架！香港人對我有感情，其實我係想拍套輕鬆劇情片，好似當年湯告魯斯嗰套咁，好溫情！但最好加幾場床戲，唔係同Daniel，係同啲靚女。」
再拍警匪片
對於被家輝讚認真，Daniel表現cool爆說：「咁又點？認真唔一定好，最緊要演得好睇。（咁今次好唔好睇？）永遠唔會滿意，藝術好難評，可以更好，不過今次係幾滿意。（想再拍咩？）警匪啦！但同佢（家輝）就咩都冇所謂啦！」林超賢表示跟Daniel闊別十年才合作，希望可盡快再結片緣，對於家輝自認美男，Daniel當堂窒一窒，林超賢則說：「佢對自己真係幾有信心！」
文：影視組