章子怡低調華麗
早前澳門新濠天地水舞間舉行的《第八屆亞洲電影大獎》圓滿結束，獎項塵埃落定，就算當晚得獎與否，眾女星花枝招展的搶鏡裝扮依然值得嘉許。本報找來星級造型師郭慶彬點評，他大讚章子怡的Clear & Clean裝扮演繹出低調華麗，而吳君如的短髮造型更顯時尚型格味道！
百花齊放
每逢春夏，花卉圖案必成大熱，花的品種多不勝數，不同品種的花兒都有着不同形態，成為各大門派時裝設計師筆下源源不絕的靈感。除了碎花、大花與卡通花等平面圖案外，還有刺繡工藝呈現，甚至化為立體花飾的一種，百「花」競艷！
章子怡
「密實得嚟好搶眼，最配合係佢個髮型同妝容好Clear & Clean，令成件事睇落去好舒服同自然，完全演繹出低調華麗。」
Jessica C.
「黃花裙花得好師奶，唔似行紅地氈，反而有種度假風情感覺，加上佢太搏，騷胸過龍，完全演繹到咩叫做『性感同肉感一線之差』！」
吳千語
「條裙有春天氣息，佢瘦削身形都着得線條比例好均勻，錯在個橙嘴，如改用櫻桃色或粉紅色唇色會更有少女味，改埋直髮造型更清新，依家似電影《倩女幽魂》中姥姥嘅髮型有啲驚！」
貝安琪
「條裙花綠綠一啲都唔靚，佢本身有肉底，仲揀條斜膊款，完全出事，着到佢好大隻，仲要刻意露大髀，美感盡失。」
吳君如
「着得好靚，簡單高貴，pastel顏色望落去好fresh，剪裁比例着到佢好高瘦，短髮造型，更有時尚型格味道。」
劉嘉玲
「全紅好sharp好搶眼，斜膊高衩設計好性感，最欣賞係立體玫瑰花飾，令整個造型生動咗。」
Profile
著名星級造型師郭慶彬（Ricky）曾遠赴米蘭與巴黎時裝周，出席品牌時裝騷有Max Mara、Sportmax、Chanel、Valentino、Gucci與Jean Paul Gaultier等，也曾被邀在中國時尚節目《美麗俏佳人》擔任嘉賓主持，現於電台擔任客席嘉賓大談時裝之道與配搭技巧，近年也被各大品牌邀請客串造型顧問，為VIP提供服飾資訊與配搭技巧。Ricky曾為李冰冰、吳君如與張惠妹等擔任造型師，地位被肯定。