陳嘉桓想獨立：要做白富美！
入行五年的陳嘉桓（Rose），打女形象深入民心，在大銀幕前拳來腳往，打出一片天。經過時間洗禮，Rose以前嚮往童話式的愛情，今日反而渴望能夠獨立，成為女強人，不怕變剩女，即使做剩女，也要做「白富美」，皮膚白、有財富，仲要係美女！
不經不覺入行已經有五年，我依家21歲，回頭一望，發現自己原來經歷好多，可能與同輩比較，自己係成熟啲，好多嘢都唔再好似以前咁小朋友，每日嘅工作已經令我唔可以去諗其他嘢，只會諗下角色，專心睇劇本。
揀男友鍾意就得
我希望今年可以拍多啲電影同劇，我之前喺佛山拍過一套內地劇，故事講述剩女，係一套都市情感喜劇，劇中我飾演一個剩女嘅妹妹，我覺得角色好得意，雖然我依家仲未係剩女，但要我去演繹一個25歲嘅女仔，同實際年紀差唔係好多，不過思想就好唔同，而且劇中我有一個30歲嘅剩女家姐，所以都幾擔心自己會唔會變做剩女。
現實中我冇男朋友，我唔係要求高，自己鍾意就得，兩情相悅咁，不過我發現香港同內地文化好唔同，內地媽媽會幫個女相親，覺得25歲就一定要結婚，因為要生小朋友，如果香港都係咁，我咪仲有幾年就做人妻？
入行後現實好多
內地有一種人叫「白富美」，係指皮膚白、有工作能力同有錢，又係美女咁解，如果係咁我做到剩女都唔緊要，我都希望做到「白富美」，結唔結婚我都冇諗，以前細個就會想結婚，但入行之後就現實好多，而且樓價咁高，結咗婚都要諗諗住邊。以前夢想都會係組織家庭，想生BB，亦會諗一生一世，大個咗就會覺得好多嘢都唔係諗咁簡單。
「狼吻事件」當歷練
結婚講時間，拍拖都要講緣分，緣分未到，都唔知幾時有，依家冇人埋身，我起咗一道牆，我識朋友嘅機會好少，而且工作忙，自己又係公眾人物，做乜嘢都會好小心，而且識朋友都要花好多時間去了解對方，所以唔敢放百分百信心，其實都幾煩，做朋友都要咁樣，做男朋友真係有排相處先得。
屢傳緋聞冇次真
男朋友都未有，仲點講結婚？拖拖吓都唔知會幾時結，次次緋聞都係得個傳字，都唔係真，我知大家都好戥我心急，但其實我仲有時間，唔使咁擔心我，可能最後我會選擇做女強人，不過又唔可以太強，呢啲嘢總有得有失！如果自己有能力，唔需要靠人都得，可以證明一個人都可以生存，我仲有好長條路要行！
名利最緊要平衡
藝人要吸收多啲經驗至會成功，話唔定第日我有套戲會令人留下深刻印象，咁就已經足夠。我唔使好出名，又唔使好有錢，名利對我嚟講只要平衡就得，有時候唔需要太執着。雖然之前發生過唔開心嘅事（狼吻事件），但係人生總會有唔同階段，我唔會話因為嗰件事而影響咗我人生，我自己更加明白我應該點樣繼續去行，繼續去做好我電影上嘅工作。
後記：招牌賣萌
雖然Rose是打女出身，功夫了得，但看上去她完全不粗魯，拍照時要活潑有活潑，要型格有型格，相當全面。記者叫她擺出她最熟練的姿勢，她即時賣萌，以招牌的燦爛笑容對着鏡頭。
Rose剛強的一面亦絕不能小覷，她出拳時力度十足，想像得到吃她一拳必定不好受，所以她絕對是位不能欺負的女生，她說：「以前我有時間都會喺公司練功夫，因為夠晒方便，又有齊晒木人樁，咁就唔使怕功夫生疏。」
口述：陳嘉桓
筆錄：李詠林
攝影：吳文聰
服裝：Kookai