黃心穎孤煮一擲 秘製冧仔牛扒
「心穎BB」黃心穎除了是宅男女神，原來俘虜男士亦有一手，雖然廚藝麻麻，但曾為前男友炮製愛心牛扒，並加上心形牛油，結果成功獲like，黃心穎不諱言有諗過認真學廚，惟現時尚未遇到一位令她願意為對方下廚的男士！
前港姐黃心穎、陳庭欣、李佳芯、林穎彤等昨日現身商場，為肥媽任主持的節目《食平DD》宣傳，貴為宅男女神的「心穎BB」雖然僅穿牛仔褲毫無睇頭，但卻有粉絲舉牌支持，輕易揮低同場幾位騷長腿的姐仔，及後於分組炮製生果盤時，心穎BB與林穎彤亦因賣相靚而勝出，可謂出盡風頭。
最拿手炒蛋炒菜
向來喜歡食的心穎BB，透露喜歡睇飲食節目，但因怕肥胖，故一直未有當有關節目嘉賓。她笑言廚藝麻麻，拿手菜是炒蛋及炒菜，問到有否想過進修廚藝？她笑謂：「有諗過，但要搵一個我會為佢煮嘢食嘅人先得。」
心穎BB又自爆：「呢個人未出現，以前都有煮過畀男友食，一次咁多，就係煎牛扒，佢都有讚，上面仲有心形牛油添！」由於6月才開拍莊偉建監製的新劇，心穎表示有意返溫哥華小休一星期，順道探望朋友。
肥媽戒有殼海產
早前動過大手術的肥媽，透露身體已復原不少，日前驗血報告也不錯，相對做手術前還要好，令其放下心頭大石，不過為健康着想，肥媽也有略為戒口，她謂：「都少食有殼嘅食物，好似蝦、蟹同雪蛤膏咁，之前做完手術冇咩氣，幾驚開唔到聲唱唔到歌呀！依家會勤力照顧身體，用黨參煲湯或者沖水，每日又會熟睡6個鐘。」
文：影視組