子丹賀傻強恨闖「賭城」
導演劉偉強昨日54歲生日，他於寓所的會所搞派對慶祝，出席嘉賓包括甄子丹夫婦、鄭伊健夫婦、謝天華、甄珍、傅嘉莉、李宇春及王晶等，會所門外貼有劉偉強監製電影《賭城風雲》海報，其公司職員惡搞一番，將原本周潤發及謝霆鋒的頭key上劉偉強的樣，並在海報上寫道：「生日風雲」、「傻強x劉強」、「飲盡天下無敵手」等字句。
談到被稱為傻強，劉偉強說：「冇所謂，由《無間道》開始已經咁叫。」問是否飲遍天下無敵手？他笑說：「梗係唔得，唔想醉住返屋企。（準備幾多支酒？）10箱8箱，唔夠再班。」提到工作願望，他坦言希望與王晶再合作，又透露正籌備原班人馬的《賭城風雲》part2，問周潤發會否再拍？劉偉強說見到他再問。
黎明送靚酒
子丹及傅嘉莉等都以酒作賀禮，問子丹是否與劉偉強鬥飲？他謂：「唔會，我年年都嚟，佢又細一歲咪慶祝吓囉！（會否自薦拍下一集《賭城風雲》？）我又唔係點賭，（有動作戲份呢？）一陣問吓佢先啦。」
黃秋生坦言都會飲兩杯，但翌日要工作，故不會飲太多，說到劉偉強會醉，他謂：「佢成日都醉啦！有乜好怕，飲醉咪瞓覺。」經理人陳善之帶了兩支酒前來，更指有一支是黎明送的特別威士忌。
文：影視組