神Kay女俠
今次《筆隨意》的主角憑包包臉兼箍牙形象殺入樂壇，嶄露頭角就開始試驗性亂化妝，榮升媽媽後身材極速逼爆鏡，這隻醜小鴨最後竟高票當選「民選女神」，她就是謝安琪（Kay）。正所謂女為悅己者容，除了老公張繼聰，Kay更要取悅一眾宅男巴打，她入行後默默打造形象，溫習時裝寶鑑惡補化妝技巧，再絕「肉」瘦身，一步一步決心變靚，女神就是這樣煉成的。
阿梅逐漸變靚
Kay入行初期不太懂化妝，曾以為將所有自以為型的東西放在自己身上就可以，怎料卻變了《少林足球》的「阿梅」，但經過多次蛻變，阿梅已變成女神！
當初聽人話我當選女神第一位，都唔知由來，睇報紙先知原來係一人一票，成件事好文明，真正反映民意。無論選咩都好，能夠喺一人一票制度下獲選好感動。成為某人嘅女神當然係好事，但由細到大都冇人稱呼過我做女神。
大家回想吓我出道時嘅外形就知我唔太貪靚，入行後我睇雜誌先知咩係眼線筆，點解刨極都斷？跟住再學點用化妝品，當時我個妝幾「勇敢」，實驗性質幾強。我會用「有趣」嚟形容自己初出道嘅樣，髮型方面，我覺得爆炸頭係最型、最轟動，不過加埋箍牙，再配個爆裂妝，就變咗「阿梅」（《少林足球》趙薇飾演的醜女）。
視嬰兒肥幸福
我當時咁似阿梅，大家覺得我進步空間咁大都啱，因為我有畀心機。首先去研究簡單髮型，搵到自己路向，公司同事又會特登買啲美容寶鑑畀我，叫我自己惡補吓，之後就開始試吓化妝。
好多觀眾認識我都係從我個仔五、六個月大嗰時，當時我仲係肥，我其實唔介意，因為人生中我冇肥過，屋企人見到我面脹脹都好開心。一個女仔為咗小朋友而有「嬰兒肥」係幸福，唔使驚同急於減。之後我去跑步，幾個月就去番100磅左右，加上我一直食嘢都好清淡，主力食蔬果，同少量蛋白質、澱粉質。
直到今日小朋友已六歲，有人喺街見到我會嗌：「你係謝安琪？點解你真人咁瘦？係咪真o架？明明睇電視記得你好肥。」我就答：「係呀，抵啲嘛，上電視可以霸多啲位。」
學生妹多人追
原來Kay自小在學校都是紅人，更試過被男仔的情詩與冧招攻陷，而張繼聰亦是自創情歌而抱得女神歸。
我讀中學時都有啲「收視率」，喺學校我好斯文，同學普遍都係讀書型，我髮型係齊陰遮眉、戴大眼鏡，好樸素，唔會刻意打扮，我亦唔敢講自己係校花。啲男仔追我嘅方式都好文藝，有人會寫情詩例如「你的笑容好像一輪明月。」再偷偷攝去我Locker。最誇張一次係，有人唔知點解配到我Locker鎖匙，有日一開見到入面有支玫瑰，後尾知係邊個送，原來上次首情詩都係出自同一個人，嗰個就係我初戀男友。
張繼聰獻情歌
至於阿聰（老公張繼聰），我入行前唔識佢，入行後大家係同一間發行公司，公司成日安排我哋一齊做騷、做訪問先識。雖然佢冇寫情詩追我，但有寫情歌畀我。我要澄清番一個搞笑報道，好多報道話我中學時好欣賞佢，成日偷睇佢打籃球，其實係錯！雖然我哋讀同一間中學，但當時唔識佢，絕對冇偷睇佢打波。
結婚咁多年我哋冇刻意維繫，真係好正常家庭，有時間就一齊湊仔。有樣嘢好多謝公司，我哋嘅助理會互相夾時間、夾假期，等大家都有家庭生活。一段關係需要努力經營嘅，我哋屋企好民主，行一人一票制，乜都攤開嚟講，唔會話邊個話事多。幸運嘅係仔仔張瞻係個幾開心嘅人，一個藝人嘅小朋友成日被注視，我唔會喺訪問講佢啲私人嘢，因為佢愈來愈大，驚佢感受到壓力。
台灣窩心之旅
Kay去年因工作在台灣住了兩個月，獲酒店員工送上愛心湯鼓勵，而Kay亦會與老公和囝囝用視像通話保持聯繫。
我試過因為要錄音喺台灣住咗兩個月，台灣人好有人情味，就算喺街度，佢哋都唔介意同你講多兩句。佢哋喺細節位上好窩心，我住喺同一間酒店兩個月，我有潔癖，有本事將間酒店房，搞到住完好似冇住過咁，有次打掃嘅工作人員忍唔住寫張卡仔畀我話：「親愛的謝小姐，我看到你住那麼久，房間都好像沒動過，我猜你工作一定好忙，才會令房間原封不動，希望我們的照顧周到，可讓你有體貼感覺，祝你新碟大賣，錄音順利！」佢仲畫咗隻公仔畀我，我見到張卡仔嗰刻好感動，後尾佢哋仲有煲湯畀我飲，其實到今日都唔知佢係邊個，但張卡仔我仲保存住。
喺台灣嗰陣有時會思鄉，但都慣咗，我係獨女，習慣咗一個人，不過我會同老公互相用電話留言，約到時間的話，會同老公、囝囝用電腦視像聯絡，臨瞓前會對電腦講「冚被啦，Good Night！」
嘲笑老公姿整
另外，我都幾鍾意台灣男仔嗰種書卷氣，好有文藝小生感覺，雖然我冇被佢哋迷到，但普遍入一間比較有設計嘅舖頭，嗰啲店員哥哥嘅樣都幾好。阿聰唔係屬於文藝，佢係野性，佢都有玩造型，衣着方面佢仲姿整過我。
服裝：Voga＠Taipo Plaza HK
化妝：Khaki Yan
髮型：Chris＠Queen's Private I Salon
口述：謝安琪
筆錄：蔡菇