吳雨霏抗拒韓大叔
以一身Rock妹造型到酒吧做騷的吳雨霏（Kary），自詡飲得幾杯不易醉，剛去完韓國暢遊的她自爆被「韓大叔」的士司機「抄牌」，雖然她不介意異地戀，但要揀叔叔做男友就大表抗拒。
吳雨霏前晚在灣仔做酒吧show，以皮褸裙現身的她炒慶全場，更有情緒高漲的女fans大叫Kary除衫，Kary當然扮聾沒理會她。Kary又自誇酒量唔錯，更踢爆最飲得的是好友鄧麗欣（Stephy），她說：「我唔係咁易冧，不過都唔係最飲得嗰個，Stephy先係紀錄保持者。」
想試異地情緣
剛與Stephy去韓國旅行的Kary，自爆被大叔「抄牌」:「搭的士個司機大叔問我攞電話，我梗係冇畀啦！」她笑言該大叔絕對稱不上是艷遇，又抗拒叔叔做男友：「大家已經有語言障礙，再有年齡代溝就唔好喇！」反而因夜蒲識了不少新朋友，她說：「男女都有，曾經有相士話我容易有異地情緣，不過我未試過，可以諗吓。」
內地做騷混亂
Kary坦言喜歡做酒吧show，不過就指內地歌迷過於熱情：「通常內地做騷特別混亂，試過因為太多人，逼到我個台好似就冧咁！」但她就不怕有醉酒客鬧事：「次次公司都會派啲猛男同事傍住，好好彩都冇見過人打交。」
文：音樂組