張家輝扭加人工多多億善
張家輝與吳彥祖昨日宣傳英皇電影新片《魔警》，老闆楊受成踢爆家輝，指他應承畀120日拍攝期，最終只得12日！家輝見招拆招，更反過來呼籲老闆們應加他片酬：「加番三、兩億梗要，唔係點同荷里活看齊？」
張家輝、吳彥祖（Daniel）、思漩、廖啟智、吳浩康、林嘉華等昨現身會展，出席新片《魔警》記者會，英皇集團主席楊受成在台上踢爆家輝，他說：「呢套戲好慘呀！家輝話咗畀120日拍呢套戲，結果只係畀到12日，真係血淚史呀！」
對英皇冇限期
家輝受訪時笑言：「楊生講笑啫，佢詐嬌，拍咗唔只12日，我對英皇不嬲都冇限期。我拍呢套戲時疊咗《掃毒》，可能楊生『詐型』，話我overlap，我小演員邊話到事，全部係啲老闆話要開就即刻要開。（到你詐老闆型？）唔係，我講個狀況出嚟啫。不如傳媒都幫我反映吓，其實收得最平係我，加番我三、兩億梗要，唔係點同荷里活看齊？」導演林超賢被問到家輝是否畀唔到期，他說：「總之我畀通告，家輝都有嚟，但我都唔記得套戲拍咗幾多日。」
Daniel拍到抑鬱
Daniel則自爆為投入角色，令自己有少少抑鬱：「呢套戲應該係我演過最黑暗嘅角色，之前去柏林睇首映，完咗要上台講嘢，我講唔到，因為拍得好辛苦，為咗投入角色心態，嗰排我刻意唔講嘢，成日自己呆咗咁望住個電視，撞啱嗰陣太太大肚，我都好唔好意思，所以拍完同咗佢去南非玩，佢話佢好明白我工作需要，我仲拍到有少少抑鬱，但未去到要睇醫生。（以後唔接咁黑暗嘅角色？）但我好鍾意黑暗嘢喎！今次林超賢的確去得好盡！」
文：影視組