莊思敏執死雞 鍊贏方中信

日前莊思敏、錢嘉樂及方中信參加珠海舉行的Clio盃賽車比賽，名人組由錢嘉樂奪冠，首次正式出賽的莊思敏則獲得亞軍佳績。

練四次車排包尾

賽前完全沒有想過會得獎的莊思敏說：「今次有十六位參賽者，其中不乏專業車手，我只係練過四次車，個比賽係男女混合，計埋我得兩個女仔。其實我喺排位賽排包尾，所以正式比賽時係最遲起步嗰個。」不過，她有師傅教路不用理會其他車手，最重要是安全及完成賽事：「佢話前面車手好易會有意外，叫我到時執死雞，果然真係如佢所料。今次係車隊第一次贊助我，我都唔想撞爛部車。（你打低方中信？）其實佢好勁，只係前面競爭太激烈而發生意外，佢同其他車發生碰撞，最後畀人撞爆車胎。」

方中信因戰車爆胎一臉無奈。	莊思敏（左二）上頒獎台領獎，被奪冠的錢嘉樂（左四）及方中信（右三）笑她好運。	莊思敏在賽車場上的英姿。

上頒獎台畀人笑

勇奪亞軍的莊思敏不諱言勁開心，覺得對贊助車隊有交代，但家人不喜歡她玩賽車，故未有捧場。賽前她乘機向前輩錢嘉樂及方中信請教，令她獲益良多：「好似教我點起步，同埋有咩規則。（有冇讚你有天分？）佢哋不停咁笑我，話我真係好彩，咁都可以上到頒獎台！」今次獲獎令她猶如打了強心針，對賽車更具信心，而車隊未來一年會繼續贊助她出賽，5月她將到馬來西亞比賽。此外，未能獲獎的方中信昨日在微博上載了賽車相，並寫道：「在珠海的這幾天，因為人實在太多了，不能跟我拍照的朋友請見諒。」

文：名人組