張建聲凸腩晒股重口味監躉
「向西仔」張建聲、黃光亮與王宗堯等，昨日以「監犯look」宣傳新片，黃光亮更入型入格「傻標」上身，當眾「試咪」鬧記者、寸司儀！暴脹變「肥佬」的張建聲，更重口味晒大肚腩、「肥美」股罅！
「向西仔」張建聲、王宗堯、黃光亮、張松枝及蔡瀚億等，昨日在灣仔會展宣傳主演電影《高登闊少踎監日記》。席間身形暴脹的張建聲，在台上突然脫去上衣，大晒「戰績」西瓜肚，轉身時更不慎露出深長股罅，認真重口味。身穿監犯制服的黃光亮，更配合大佬角色當眾「試咪」，抵死地用粗口鬧記者：「影乜Ｘ嘢？」更反問司儀該片有何教育意義：「呢套戲教人坐監？係反面教材？」之後，他又即場「揮刀」替王宗堯剪髮，嚇得對方瞪大對眼跪求，場面爆笑。
三個月增32磅
事後，張建聲自言為該片在三個月內，增肥32磅至180磅，不過《高》片於四月尾開拍，導演則要求增至200磅。如今靚仔變肥佬，豈不是難識女仔？他笑謂：「點識？依家連照鏡都唔敢，街都唔敢出，一出街就消耗卡路里！呢啲戲一次就夠，（片酬？）暫時未傾。」問到有否考慮日後如何減肥？張建聲說：「阿一（老闆蕭定一）預計6月後拍《一路向西2之泰西》，要3至4個月內減到130磅！」
久未露面的何家駒，片中再次飾演監犯，當年憑電影《監獄風雲》為人熟悉的他，表示以經典角色的「惡人」姿態，自2000年起在內地登台唱歌、「鬧」觀眾，密密勁賺二、三千萬人仔，並謂今次接拍該片純粹為興趣。
文：影視組