胡定欣攣直唔拘 搞完宗澤咀子珊
無綫昨日大晒冷，派出共41名小生花旦力谷10套今年播出的新劇，當中以同性戀為題材的《點金勝手》成為焦點，席上播出徐子珊裸背上陣，上身僅戴黑Bra的胡定欣則坐在黃宗澤大髀上，兩女更有咀嘴鏡頭，看得全場嘩然。
一年一度影視娛樂博覽昨日開鑼，無綫將一連兩日於會場中舉行「TVB 2014節目推介記者會」，力谷今年播出的10套新劇。席上無綫派出41名演員大晒冷，包括黎耀祥、佘詩曼、林峯、徐子珊、胡定欣、吳卓羲、郭晉安、萬綺雯、王祖藍、陳展鵬和陳茵媺等，場面墟冚。因與楊崢的戀情而成新聞人物的黃宗澤則以病為理由缺席。
阿佘：劇組再拜神
雖然黃宗澤缺席，但他主演的同性戀題材劇集《點金勝手》卻成為全場焦點。現場播出部分片段，當中不乏重口味鏡頭，包括上身僅穿黑Bra的定欣坐在黃宗澤大髀，非常火辣。其他情慾片段亦陸續有來，繼有定欣和子珊激咀，又見子珊裸背上陣。而人妻郭羨妮於《無雙譜》露香肩，以及與不少演員啜咀場面，看得現場觀眾嘩聲四起。
至於另一套重頭劇《使徒行者》因不少演員受傷辭演而換角，演員佘詩曼、林峯昨日談到頂替森美的沈震軒亦傷手腕時，兩人均稱未有影響劇集進度：「聽聞稍後劇集會再拜神祈求順利。」阿佘又稱完成《使》劇後會再為無綫拍劇，但希望先放假旅行充電：「去邊度都冇所謂，最緊要係休息一吓。到時會同啲姊妹去，但係佢哋大部分都做咗阿媽，度期都有難度。」
陳茵媺分享湊仔經
完成手術復工的沈震軒稱預計要兩個月復原：「冇諗過傷得咁重，唯一慶幸係冇傷到塊面。」以《叛逃》演員身份出席的陳茵媺，對於呂慧儀暗示懷孕，茵媺說：「啱啱知道，都會SMS恭喜佢同埋分享吓湊BB心得。」
文：影視組