杜汶澤罵戰遭恐嚇禍及阿田
向來敢言的影星杜汶澤再與內地網友展開罵戰，他公開多名90後網友樣貌，引來部分網民抨擊，更有人出言恐嚇，但阿澤依然企硬表示未驚過，並說：「唔通鬧完人老竇老母個樣就唔畀得人睇嘅？」但他更被網民進一步恐嚇威脅：「小心田蕊妮一起陪葬！」
影星杜汶澤近日就台灣反服貿事件發表言論，引來大量內地網友圍攻，有的更出言恐嚇，其後阿澤「轉戰」Instagram說：「我說的是『某些』大陸網民的確很野蠻，但並非指全部，如果你要對號入座是你的事，不用再說甚麼『有本事別來大陸圈錢』，我告訴你：『有本事阻我來大陸！』」他又將多名鬧他的90後網友相片公諸於世，再度引來爭論，事件愈演愈烈！
五十多萬人支持
昨日阿澤以監製身份出席電影開鏡儀式，認為事件難以平息，藝人應盡社會責任，對於公開網友樣貌，他說：「係咪我個樣見得就畀你鬧，你個樣就唔見得？唔通鬧完人老竇老母個樣就唔畀得人睇嘅？（有八千幾人鬧你？）我有60萬人Follow，證明仲有50幾萬人喜歡我吖。」他又指該批90後網友於89年後出世，未經歷過很多事情，奉勸大家不用因他們的言論太激動。對於有傳內地封殺部分台灣藝人，阿澤說：「呢啲負面恐嚇式新聞唔知邊個講出嚟，真係先算。」
而提到黃秋生早前暗示不再跟他合作，阿澤若有所指地說：「年紀大嘅人要有分析能力，對自己講嘅嘢負責任，不過我喺facebook寫嘢係令香港人開心啲，如果不停鬧港人係契弟有咩意思？傷害香港人感情。」
「小心走光呀？」
而有人出言恐嚇阿澤指：「出街小心啲！」不少網友即和應兼愈講愈激，更進一步留言威脅：「小心田蕊妮一起陪葬！」阿澤接受電話回應時表示不擔心：「香港係法治社會，而且我老婆助手好肥，有咩都擋到幾刀，佢又成日喺TVB拍劇，守衞好森嚴！」其太太田蕊妮則輕鬆回應：「小心咩？小心走光呀？」
此外，田蕊妮前晚與張景淳到西貢一個泳池拍攝無綫劇《無雙譜》落水戲，阿田穿上兩套泳衣及包了幾層保鮮紙，再加潛水衣保暖，準備工夫十足。劇情講述她沉船被捲入水底，故要戴上15磅鉛塊，期間她不慎喝水不停咳嗽，一臉倦容的她表示近四日只睡了八個小時。
文：影視組