阿Sa慾搏搵華哥加操

任達華、阿Sa、孫佳君及女新人岑紫生昨日到元朗一所學校出席英皇電影《雛妓》開鏡儀式，監製杜汶澤、導演邱禮濤及英皇老闆楊受成專誠撐場，身穿校服的阿Sa扮學生妹，雖年過三十仍少女味十足，跟初出道時一樣清純可人！

片中華哥及阿Sa飾演一對戀人，有不少親熱鏡頭，華哥透露已拍了一場，大讚阿Sa原來相當性感及有身材，並非如阿澤所說的iPad身形，他說：「都幾親密，我畀佢搞到臉紅，我皮膚咁黑都臉紅呀！其實佢好性感，係有啲身材嘅！佢依家有，將來都一樣有。」他又笑言要恭喜阿Sa男友陳偉霆，相當搞笑！

楊受成率高層及眾演員切燒豬。

孫佳君在《雛妓》中不乏發揮機會。

人前解放難為情

當阿Sa得知華哥讚她「有啲身材」後，即雀躍地說：「嘩！我從來冇試過拎到個『啲』字！」她透露片中有大膽裸背鏡頭，問到要跟華哥拍親熱戲，平日有否練習？她笑說：「我好OK！有少少經驗，得閒咪練下囉！」更笑言要搵華哥「加操」！問到呢排會否辛苦了男友？阿Sa說：「佢唔喺香港喎！」她又呻拍床戲比打戲更辛苦，要在眾工作人員面前大解放甚難為情，幸得前輩華哥帶她入戲。

此外，剛過了生日的華哥透露跟家人及朋友連環慶祝，已吃了六、七個蛋糕，笑言食肥了略感內疚，至於女兒又畫畫又送蛋糕，令他冧爆！

文：影視組