李蕙敏再振作 獻聲傳愛
入行25年的李蕙敏（Amanda)在事業雖然並非一帆風順，但憑着默默堅持，終於舉行首個演唱會，以答謝歌迷一直以來的愛及支持。而談到經典作《你沒有好結果》時，Amanda更指首歌連累她很久，因眾人都以為她是粵語殘片中的受害者。
歌手李蕙敏（Amanda）入行25年後，即將舉行首個演唱會，Amanda現時亦籌備得密鑼緊鼓，她說：「感覺好興奮、好開心！今次嘅主題係講『愛』，大家都知道我踏入咗人生另一個階段，加上有時喺街度撞到支持咗我好耐嘅歌迷，佢哋會同我講：『我鍾意聽你啲歌喎，你好似好少喺香港唱歌！』聽咗好耐，所以都好想舉行一個演唱會去多謝歌迷們嘅愛！」
樂觀愛笑
早年，Amanda因唱出《你沒有好結果》而爆紅，自此這首歌恍如魔咒般，總是與Amanda的身世、事業、愛情路環環相扣，對此她說：「好多人唔清楚我，以為我係粵語殘片啲被害者，但其實我係一個鍾意講笑同好樂觀嘅人！同埋，呢首歌都累咗我好多o字，例如喺我拍拖嘅路程，因為好多香港男仔都覺得我係堅強、奄尖嘅女仔。」
新婚甜蜜
Amanda去年與外籍老公Serge結婚，談到新婚生活時，Amanda亦難掩甜蜜之感，並說：「好似今年咁，我哋正式喺新年派利是！我同老公講：『應該好多人問你攞利是，因為你係第一年結婚！』點知佢好招積同我講：『冇乜人同我攞，因為我係鬼佬。』跟住我話佢：『你試吓同我一齊出去呀，派到你唔派呀！』」
文：專案組
攝：秦健輝
場地：RED Bar+Restaurant
服裝：Marc by Marc Jacobs