千嬅播MV氹扭計囝囝
歌手楊千嬅大爆囝囝遺傳自己唱歌了得的才華，最重要是當播放她本人的MV時，囝囝就不會再扭計，呢招果然使得！
歌手楊千嬅、設計師王幼倫、女星陳寶珠及梅雪詩，昨日出席領賢慈善基金「粵劇推廣項目」贊助的《再世紅梅記》慈善首演。領賢會員之一的千嬅表示屆時會與媽媽捧場看《再世紅梅記》，笑言要找老公湊囝囝 3個小時，但怕老公沒有耐性，又指囝囝只要不大叫都可考慮帶囝囝同行欣賞。
想帶囝囝睇粵劇
千嬅亦透露曾在慈善活動上演出過粵劇，與張敬軒及古巨基做對手，覺得好難。問到將來會否帶囝囝學粵劇？她直言：「帶佢睇先，佢依家有聽我啲歌，播MV見到我，佢會叫媽咪，所以有時扭計搵我，就會播MV畀佢睇。」她直言囝囝識唱兒歌，有自己的遺傳，故會培養他音樂方面才能：「佢有八隻牙仔，仲爆緊4隻，發音方面未準，我試過畀佢畫畫，但畫唔到。」
王幼倫成寶珠粉絲
主演《再》的陳寶珠及梅雪詩表示師傅白雪仙因感冒而未能出席記者會，問到仙姐排戲監場是否會鬧她們？她們說：「唔係鬧，係教。（仙姐拎住劇本捉你哋字？）有，教我哋講，自己會投入，都會有自己畀自己壓力。」二人透露《再世紅梅記》會再做11場，更希望有機會到外地演出。而梅雪詩表示未知龍劍笙會否回港欣賞演出。
此外，王幼倫以慈善基金主席現身，她笑言為這次籌款看了寶珠過往作品而變成粉絲，亦覺得陳寶珠與梅雪詩尊師重道的態度已經絕種，後輩應該學習。
文：名人組