李蘊撐好友：睇清楚個人
李蘊和G.E.M.一向姊妹情深，對於林宥嘉親口承認與G.E.M.「分手」，李蘊似早知內情說：「係呀，佢自己認咗分手？（經理人張丹話G.E.M.以淚洗面？）咁我一直都知，G.E.M.係我好朋友，佢哋關係最清楚，我見證佢哋起起伏伏，只係最尾個男仔點解要咁樣，唔可以因阿G.E.M.太忙，而成為佢做呢樣嘢理由囉！（有小三？）我唔知喎，我只知G.E.M.對愛情好專一，係好忠誠嘅女仔，睇佢對呢個男仔咁多年感情嘅付出，但對方就咁破壞咗，可以話睇清楚一個人。」
李蘊更替G.E.M.不值說：「呢排啲負面新聞搞到啲人誤會G.E.M.，話佢人紅咗先唔要佢，根本唔係咁。（G.E.M.戀上年長22年嘅外籍監製？）梗係冇啦，監製有個又高又靚女朋友o架，佢哋只係工作夥伴。」李蘊指G.E.M.心情早已平復，而G.E.M.唱《龍捲風》唱得投入都要多得林宥嘉。