Cara G. 乳頭細 囡囡難搵食
剛榮升做父母的混血模特兒Cara G.與丈夫Jesper現時全力湊B，Cara大嘆餵人奶不容易，除了抱B抱到手軟兼不夠瞓，奶水充足的她竟因乳頭太細令BB難以找到，亦難於啜實飲奶。
新手媽咪Cara G.與老公Jesper昨日帶同初生女兒India到瑪麗醫院覆診，由身為爹哋的Jesper負責抱住愛B，期間夫妻兩人恩愛咀嘴，表現溫馨。Cara透露BB之前羊胎水入肺，曾留在ICU一段時間，令兩人十分擔心，幸好現時BB身體已無大礙。
花了近四十小時分娩終成功誕下India的Cara，被問到下胎會否怕怕，她坦言：「都會驚，醫生話我子宮太細，唔夠大畀BB出嚟，所以下次再生，等BB八個月就要攞佢出嚟，不過我唔心急再生。」
老公幫忙湊女
Cara稱因為餵人奶關係令她睡眠不足，她笑言：「對上一次連續瞓足六個鐘已經係上星期一嘅事。而且抱住佢餵人奶搞到雙手好攰，餵人奶唔係易事。（你唔夠奶？）我有好多奶，但我個乳頭太細，BB搵唔到亦好難啜得實，我或者泵定啲奶出嚟會方便啲。（BB易唔易湊？）佢係開心BB，不過佢朝早成日瞓，夜晚唔肯瞓，如果掉番轉就好喇！」
Cara大讚老公幫忙湊女，令她可以趁機休息：「我仲有媽咪同兼職helper幫手湊，但我唔想太依賴佢哋，都係想自己湊，唔想錯過任何時刻。」
文：名人組