婷婷私有化姪仔 「要霸住佢哋」
謝婷婷昨日穿低胸裝出席活動時俯身露波罅，她透露已半年沒見過一對姪仔Lucas及Quintus，她說：「媽咪（拉姑）都有去新加坡探佢哋幾次。媽咪有一半時間都喺新加坡，因為鬍鬚Kong（拉姑丈夫）有屋喺嗰邊。」婷婷又透露去年聖誕因工作而錯過了姪仔的電話，她眼濕濕說：「佢哋留言話『姑姐你喺邊？點解唔聽電話？』雖然見佢哋唔係多，但都好有親切感。（怕唔怕再唔探佢哋，佢哋會唔記得你？）唔好咁講啦。我唔想佢哋失望，覺得我唔喺度。」
栢芝露腰吸金
問婷婷會否介紹新男友給姪仔識？她即詐傻反問：「邊個呀？」記者指明是Uncle Sean（戴尚安）後，她說：「我哋咁少時間見，見到面都盡量講故事畀佢哋聽。就算帶朋友去，都要霸住佢哋。」
而近日頻頻在內地曝光的張栢芝，早前以露腰裝錄影電視節目，並露出腰間紋身，有指她返內地工作一周，便穩袋500萬人民幣，吸金力甚強。
文：名人組
