萬綺雯拍劇樂執三攤
擁有42吋長腿的「凍齡美魔女」萬綺雯（蚊蚊），新劇中與張繼聰及黃智賢（Ben）合作，蚊蚊盛讚阿聰風趣、阿Ben體貼。對於被指「執三攤」，她揚言不會在意外界閒言閒語，只會在意自己的表現。
蚊蚊在新劇《食為奴》中，再與劇集《老表，你好嘢！》的演員王祖藍、張繼聰、林盛斌等合作，她說：「當然想好似上次咁好收視，但唔會因為咁而有壓力。其實今次都唔完全係舊班底，阿Ben就係首次合作，佢個樣睇落好嚴肅，實則好好玩，搞笑又細心，喺橫店試過幫我出去買嘢食，買咗粟米、蛋餅同豆腐，我一個人邊食得咁多？但後尾蛋餅太鹹、豆腐變壞，最終只食到粟米，如果佢唔買三樣嘢，可能我就冇嘢食！」
即學即打
蚊蚊透露劇中有不少動作戲，除要控制飲食，動作亦要即學即打，她說：「好在我中學有玩體操同彈床，好快攞番個感覺，但體能上負荷都大，有場我同張繼聰喺小朋友面前耍功夫，結果好多甩漏，班小朋友睇到哈哈笑，我哋仲差啲打中對方塊面。（唔驚破相？）拍戲要信任對方，如果唔係仲牙煙。」
老公捧場
《食》劇演員陣容多番更改，蚊蚊角色由陳法拉變鍾嘉欣，最後才落實由蚊蚊演出，但她不介意被指「執三攤」：「呢行成日都變來變去，唔同人做有唔同效果，擦出火花最緊要，既然依家係由我演出，我關心嘅就係點樣做到最好！唔會理閒言閒語。（老公陳十三對你演出有咩評語？）佢唔忙都會捧場嘅，會關心我動作戲安唔安全？叫我拍嘢量力而為，其餘任我自由發展。我係熱愛自由嘅人，唔可以畀嘢綁住o架！」
採訪：影視組
攝影：秦健輝
髮型：Domanic Tao（Pic4.com.hk）