巫啟賢狠批韓星賣貴飛咪嘴
巫啟賢將於下月初舉行「發燒級」音樂會，為求品質不惜工本請來世界級音樂人助陣。巫啟賢特別將票價定於一千元，揚言要做一個媲美 韓國騷的音樂會，又狠批時下韓星們收高昂票價卻咪嘴演出！
歌手巫啟賢昨日到電台宣傳他於4月2至4日一連三日在演藝學院舉行的「Back to Innocent重回巫啟賢演唱會」，由於他會在演唱會上作現場錄音推出演唱會「靚聲碟」，故今次會動用所有音樂資源，包括請來世界級樂手助陣，不惜工本做一場真正的「發燒級」音樂會。
以高質素「挑機」
由於演唱會在演藝學院舉行，每場騷只會容納五百名樂迷，巫啟賢說這次演唱會票價劃一一千元，因他有感近年香港樂壇被「韓流」攻陷，韓星來港開騷掘金，票價動輒過千元，故決定「肥水不流別人田」，要造一場高質素的演唱會向韓星「挑機」，他說：「我今次特登將票價定一千蚊，唔係韓國歌星來開騷你哋就肯畀一、二千元睇，我哋唱中文歌，都可以做到呢個水準，我一定會令大家覺得，你行出門口會覺得係抵，同平咗添！」
BoA SHINee「失手」
講得興起，巫啟賢更「巫老師」上身批評時下韓星來港開騷「咪嘴」：「韓國有啲歌手咪嘴你哋又畀二千蚊！（咁講唔驚畀佢哋嘅粉絲批評？）講事實嘛，同埋唔係講所有，只係有啲咪嘴。」翻查資料，韓星來港獻唱被傳疑似咪嘴的，包括去年韓國歌手BoA、SHINee、EXO等，他們來港出席音樂活動於三號風球下又跳又唱毫無失準，但一講說話咪高峰即接連失靈，即惹來咪嘴疑雲。
巫啟賢又表示今次沒有預女兒份，笑言她未夠班：「之前雖然同佢喺會展、紅館同台演出，畀佢上去玩吓開心吓啫，今次要求太高，要即場錄音，佢未夠班，所以佢都有少少唔開心！」屆時他的徒弟鄭俊弘、歌手泳兒、古巨基等將會助陣演出。
文：音樂組