張國強新廣告進軍內地
張國強（KK）與模特兒何紫綸（Ann）昨日到西九龍中心，出席《有衍生．中國人唔係東亞病flu》宣傳活動，KK透露新一輯廣告快將推出，他說：「我同衍生合作咗四年，嚟緊會播新廣告，又會進軍大陸，到時我都會返內地宣傳。」
談到明星足球隊隊友黃日華近日新聞，KK說：「家家有本難唸的經，我唔了解成件事，但佢應該可以妥善處理到。」
Ann則透露早前做手術割除子宮纖維瘤，她說：「康復緊，最近忙同朋友搞模特兒學校，稍後會有公布，我會做導師同經理人，但朋友話我份人太『稔善』，要嚴啲教學生。」談到患病期間，有追求者送花膠慰問，Ann說：「個男仔原來好叻煮嘢食，都有煮畀我食，我鍾意男仔識煮嘢。（屋企玩煮飯仔？）係呀，不過仲未係男友，觀察中。」