宣萱同鄰居駁火座駕互阻出入

昨日有讀者向本報爆料，自稱與宣萱居於清水灣同一屋苑，指她多次在無原無故情況下將其座駕橫泊，似有阻礙其他住客出入車之嫌，宣萱亦曾試過就訪客車位被一名南亞裔業主友人佔用而大發雷霆。爆料者又指摘在場保安縱容宣萱，就以上種種行為，懷疑宣萱精神不穩。

粗口侮辱

記者昨日就此事向宣萱求證時卻原來另有內情！宣萱指事件始末發生於前日早上，當時其座駕被爆料者的座駕阻礙，曾聯絡對方將座駕駛開，但沒料對方以老公拿走車匙為由，未能駕駛移走，最終令她苦等一小時。之後宣萱以牙還牙，以同樣方式對付對方。她謂：「佢呢個行為好自私，所以我搵番自己架車頂番佢，要畀佢感受番被人頂嘅滋味。跟住佢開始發難，不停用粗口鬧我，佢太太喺旁邊用手機拍住我添。」

宣萱座駕（左）打橫泊阻礙其他車輛出入。

宣萱另一座駕更泊在鄰居的車位出口。

不甘被粗口侮辱的宣萱謂：「佢粗口鬧我唔使抖氣，個男人一度『哄』個頭去我面前想打我，我覺得自己人身安全受威脅就去報警。期間有看更見到咁情況都冇理走咗，警員到場後就勸我哋，話係私人地方，叫大家自行解決就走。」

不過事件還未完結，當晚宣萱母親到訪晚膳時，期間聽到該夫婦身處天台破口大罵。之後她送母離開時又遇見該夫婦，繼續被粗口謾罵。她說：「我媽咪聽到覺得佢哋好過分，先同佢哋理論，我仲叫媽咪冷靜啲，唔好同佢嘈。可能對方覺得我係藝人，如果將件事公開一定係我蝕底，但我問心無愧，唔怕佢，話我精神不穩？我覺得佢哋嚴重好多。」

好友力撐

與宣萱分屬好友的陶大宇和歐陽震華，得悉她遭到鄰居投訴兼粗口侮辱，即力撐宣萱不是撩事鬥非之人。二人均覺得很多人「恰」明星，利用傳媒將事件搞大，不少藝人都要忍氣吞聲。

文：影視組