張舒雅學做生意公主不hea
在卡通片《多啦A夢》及電影《整蠱專家》中也有「誠實豆沙包」，吃了的人會乖乖說實話，相信張舒雅應該是由細食到大，否則性格不會如此率直，無論對任何人，也是有話直說，不加修飾，她的昔日「榮銜」—「最hea港姐冠軍」也是因此而來，五年後的今天，張舒雅自覺有所長進，但不變的依然是那份難得的爽直坦率，她不認為自己是港女，但就直認有公主病。
其實「最hea港姐」呢個朵係我起畀自己o架！當日我接受訪問話自己都幾hea，跟住傳媒就開始用，個名我覺得冇乜嘢喎，我唔係好理人睇法，對我嚟講hea係代表舒服、好relax，我覺得oko架！當然呢個朵唔多唔少都會令其他唔熟悉我嘅人對我有誤解，但我會以行動證明我做嘢唔係hea。
修讀珠寶設計
以前參選港姐係為咗攞人生經驗，冇諗過入娛樂圈，我覺得比賽完咗就完咗，所以唔會好積極咁爭取做嘢，依家事隔五年，我覺得自己人大咗定咗，做事會顧後果，開始會諗嘢，以前比較自我，鍾意做乜就做乜。
我絕對唔係事業型女性，亦唔係工作狂，我喜歡享受生活，覺得唔可以為工作而冇咗自己嘅私人時間同生活，但要做嘢嘅時候我都會好認真，我係work hard play hard嘅人。依家我喺Daddy間珠寶公司學做生意，公司係屋企生意，唔可以話係責任，但我會好上心。我喺公司冇特權o架，每日返朝九晚五，放工就去讀珠寶設計課程，唔可以走堂，因為走堂就唔合格，我已經讀完初階同進階。
談吐有待改善
我啱啱有自己嘅珠寶作品，但仲未成為商品，除咗設計，仲要學人事管理同見客戶，但同事知道我份人好直接，有嗰句講嗰句，談吐應對方面要有所改善，所以到依家我都未試過單對單見客，只係喺旁邊睇其他人點做。對我嚟講，傾生意唔容易，但我鍾意有挑戰性嘅工作，尤其傾成一單生意會好開心、好有滿足感，我以前都試過幫公司喺珠寶展覽嘅攤位向客人推銷o架！
戀愛狂 情緒易波動
張舒雅戀愛大過天，有拍拖時情緒波動大，容易影響到開心指數。
可能有人會以為我係港女，我係喺美國同英國讀書返嚟，性格比較鬼妹仔，但絕對唔係港女，至少我唔會係「14巴港女」，打男朋友嗰個，亦唔使男友就晒我，大家互相遷就囉。
有男朋友好煩
不過，我以前真係戀愛大過天，但依家單身後就唔係咁諗，我朋友話覺得我單身後個人開心咗，因為我向來係好樂觀同開朗嘅人，但拍拖會令我情緒好波動，會畀對方影響咗我嘅開心指數，我真係覺得有男朋友都好煩。我依家好開心，有家人有朋友，如果叫我排名次，順序係自己、家人、朋友、男友。
屋企「幾個阿媽」
張舒雅從小就有不少工人服侍，呵護備至，難怪舒雅說：「我當佢哋係我阿媽。」
至於公主病呢，我一定有，但只限於喺屋企發作，因為屋企人好錫我，工人由我出世湊到我大，所以佢哋樣樣嘢都會幫我做，好照顧我，我當佢哋係我阿媽咁，不過出到去外面就唔會當自己係公主，有時喺出面會吞聲忍氣，返到屋企就對屋企人發洩，哈哈！
後記：丟低手袋睇公仔
首次跟張舒雅做專訪，感覺她非常率真爽朗，言談舉止有時帶點Man，雖然她自稱有公主病，但卻未有在記者面前病發，反而流露出童心未泯的一面，當她在商場看見可愛卡通人物，竟丟低名牌手袋在地上，走去跟公仔拍照，臉上還掛着滿足笑容。我也撐她不是港女，至少不會刁僑扭擰難服侍。
口述：張舒雅
筆錄：名人組
攝影：司徒國榮
服裝：Kookai