嘉欣展鵬谷行料水底激咀
緋聞男女鍾嘉欣和陳展鵬繼早前因拍劇被影到在山上拖手仔後，前晚再因拍劇而奉旨落水談情，兩人還在水中激咀！展鵬更謂有默契，冇隔膜。而不懂游水的嘉欣亦不怕「男友」伍允龍呷醋，大讚展鵬泳術甚叻似鱷魚一樣犀利。
鍾嘉欣和陳展鵬前晚在西貢片場為新劇《大藥坊》拍攝一場落水戲，劇情講展鵬要英雄救美，為缺氧的嘉欣做人工呼吸，故二人要在水中嘴對嘴上演一幕人工呼吸戲，十分浪漫！不過前晚入夜氣溫跌至11℃，二人凍得發抖，他們均表示事前除特地買了件私伙潛水衣，落水前要吃朱古力增加熱能，上水後更狂飲熱飲及圍毛巾保暖。
讚泳術勁似鱷魚
由於嘉欣因不懂游水，故由替身代她與展鵬拍跳水戲，而水中戲才親身上陣，嘉欣笑言比起早前拍劇集《飛虎Ⅱ》時的落水戲，今次有經驗已沒有那麼驚恐。她又大讚展鵬泳術高超：「佢游水好勁，嗰次我哋喺新娘潭拍水戲，佢可以好似鱷魚咁，慢慢開眼。」問到她有否跟緋聞男友伍允龍備案將拍咀戲，她說：「冇喎，工作嘅事我大個女自己搞得掂o架喇，我入行都十年啦。」
避提失錢傷心事
而展鵬就表示首次在片場拍泳池戲故十分期待，由於兩人有咀嘴戲，問他怕不怕嘉欣男友呷醋？他說：「點解怕？我好少理，大家都係演員，又唔係第一次合作。（有晒默契？）有默契啦，冇隔膜。」談到嘉欣拍外景時失竊三千多元，問到有否呵番嘉欣BB時，他笑說：「係咪應該唔好再喺佢面前提，應該詐唔知，費事提起佢啲傷心事，惟有大家互相幫吓眼睇住啲貴重嘢。」
文：影視組