李思欣求突破唔講錢
李思欣與無綫合作九年，快將滿約的她坦言未定去留，她表示做了多年，對自己都有一定的要求，現階段要的不是錢，而是發揮的機會，百足咁多爪的她還計劃多多，做生意之餘更會於電台開咪做主持。
李思欣不經不覺已於無綫九年，由第一套參與的劇集《赤沙印記＠四葉草．2》開始，拍的劇集都很多，不過思欣坦言與合作多年的無綫即將約滿，現時還未跟公司傾合作事宜，不過現在外面都有不少出路。
思欣本身有做網上鑽石生意，之後亦會首次於電台主持自己的節目，可謂百足咁多爪，說到與無綫續約的成數，她不諱言亦有其他電視台與她傾過，但還未落實，但她表示自己着重的，不是金錢，而是機會。思欣說：「今年嘗試多啲唔同嘅嘢，依家都諗緊簽TVB定出去發展，之後我都會同冼色麗做一個類似電台版的《姊妹淘》，而且我都有跟戴辛尉學唱歌，想為自己將來計劃一下。」
努力學唱歌
思欣之前一直於無綫拍劇，坦言最首要的是演戲上的工作，不過於無綫多年，演的多是古裝或清裝劇，她表示不想再局限某些角色上，望可嘗試其他角色，如醫生、律師等專業人士角色，她說：「做咗咁耐，都會對自己要求多啲，希望可以有較高層次的嘗試、機會，依家自己所睇嘅唔係錢，睇嘅係戲份與機會，希望遇到有質素的角色。」
思欣現時有學唱歌，問她對此有否大野心時，她坦言：「唱歌對我嚟講係好深，老公（范振鋒）好多年前都係跟戴思聰學唱歌，基本功好好，依家自己學想快啲有成績，但急都急唔嚟，要慢慢練好啲先。」
文：影視組
攝：謝國華