徐小鳳出波點裙唔着驚暴動
歌后徐小鳳前晚舉行的紅館騷除了大唱經典金曲，更將音樂會變成talk騷，化身「神鳳」即場揀蟀，又公然和男歌迷調情，向對方高呼「I want you」，令台下歌迷捧腹大笑！當她着招牌波點裙出場時，搞笑謂唔着怕會引起暴動。
殿堂級歌后徐小鳳共八場的「小鳳姐走過順逆流，依然金光燦爛徐小鳳2014演唱會」前晚假紅館開鑼，開騷前曾表示為演唱會控制飲食的小鳳姐，整晚換上五套華麗長裙，大騷其招牌小蠻腰，可謂風韻猶存！當晚小鳳姐除了大唱自己的經典金曲外，更揀唱羅文、梅艷芳、郭富城、周杰倫的歌曲，令歌迷聽出耳油！
演唱會中更變成talk騷，小鳳姐頻頻和台下歌迷互動大放笑彈，叫歌迷主動向喜歡的人示愛，又指香港人有時比較怕醜，豈料台下即有男歌迷大嗌：「I love you！」小鳳姐聞言即笑說：「講英文添，多謝多謝，I need you，I want you！」之後有歌迷向小鳳姐吹口哨，她笑道：「我去街成日有人咁調戲我，我已經慣，話畀大家聽，我以前都係飛女嚟！」說罷更即場露兩嘴，和歌迷大鬥口技，令全場爆笑。最後安哥時小鳳姐換上萬眾期待的招牌波點裙，笑言不着會引起暴動。期間小鳳姐在揀歌環節，台下有歌迷大叫：「揀我！」小鳳姐即說：「揀你？又得喎，請你企起身，睇我揀唔揀得落手，扮個靚樣嚟睇吓！」
孖盧冠廷Jam歌
當晚小鳳姐請來盧冠廷擔任嘉賓，兩人即興Jam歌，小鳳姐更越級挑戰英文歌，令盧冠廷大讚：「小鳳姐前日先學，佢真係好聰明，兩日之後就識唱英文歌！」而小鳳姐大騷其學英文方法，將英文歌詞譯成中文同音字，更在大螢幕上打出譯音歌詞，邀請歌迷大合唱，場面搞笑！
文：音樂組