驚爆有10歲女楊崢：傳聞失控

本月初「崢澤戀」被本報獨家踢爆後，短短半個月，有關女方負面新聞不斷湧現，當中涉及不少模特兒，先有傳她曾介入大肚黃佩霞與男友戀情，又指她執陳嘉容二攤與Bosco相戀，身為兩人好友的歐陽妙芝更唱衰楊崢，直指當年楊崢搶黃佩霞男友是「事實」。雖然楊崢多次表示：「唔係事實嘅唔回應，當事人已經否認咗。」怎料仍被惡意攻擊，昨日網上更驚傳未婚的她竟然已經有一名10歲私生女！

「咪當笑話聽」

記者昨日聯絡楊崢，對於網上驚爆她育有一名10歲的私生女，她回應道：「絕對冇咁嘅事，傳聞愈傳愈誇張，已經失控。咪當笑話聽囉，都係笑吓就算。」

對於妙芝指她硬搶黃佩霞男友，楊崢昨晨在電台澄清：「十幾年前已經講過，之前又回應過，唔係真實嘅嘢。」做完節目後她到停車場取車，繼續駕駛Bosco愛車。再問她被唱衰一事時，她說：「否認咗好多次，唔知講咩。（有冇同Bosco討論？）冇。」對於被其他模特兒齊聲指證，她說：「其他人嘅事唔回應啦！（後悔咁高調戀情？）不嬲冇高調。」

黃宗澤連日來均表示想戀情低調，不想多作回應。	楊崢曾與小朋友一齊行騷，母愛氾濫。	姚書軼表示與楊崢不熟。

繼妙芝唱衰楊崢後，昨日姚書軼與莊思敏分別出席活動時又再爆料，直指楊崢曾經行Show失場。姚書軼稱與楊崢不熟：「我同佢做嘢五隻手指數得晒，我冇佢電話。」更指楊崢試過失場：「我哋工作一堆人，佢就唔知行去邊，可能佢忙啩。有次一齊做嘢，佢可能Miss咗個Show。（即係No Show？）係，原來可以咁！」記者再追問楊崢為何失場？姚書軼說：「係呀，可能有意外。」問覺不覺楊崢有名模架子？她坦言沒有：「大家都係名模，行出嚟都有氣場。（佢氣場壓過你而蝦你？）冇，佢工作態度Nice，不過係我同佢只會Hi同Bye。」

可能太早趕唔切

而莊思敏昨晚出席春茗晚宴時亦接力數楊崢，她表示與對方少合作，但指她曾失場：「以前一日早午晚行三場Show，佢試過早上嗰場No Show，可能太早趕唔切嚟。（佢之後有咩表示？）話自己病。（幾時嘅事？）四、五年前，佢仲試過活動散咗先到。」對於姚書軼及莊思敏的言論，楊崢表示不欲多談，以免愈描愈黑。

文：專案組