徐小鳳晒招牌纖腰驚走光

演唱會以四面台設計，當台中央的布幕緩緩升起，小鳳姐便在圓形舞台出現，而小鳳姐鍾情的「魚尾長裙」造型凸顯其招牌「小鳳腰」，並以《風的季節》為演唱會揭開序幕，小鳳姐向現場觀眾打招呼表示：「終於畀我等到今晚，多年冇見，我哋又喺紅館見嘞，你哋好嗎？歡迎你哋光臨。」又再謂：「唔知講乜好，千言萬語化成衷心一句，多謝你哋嚟支持我。」

男迷苦等多年

一向親民的小鳳姐，到台邊與歌迷握手又送吻，更出動了私家平板電腦和歌迷合照，有男歌迷表示等了小鳳姐多年，由十幾歲到依家，氹得小鳳姐很開心，表示：「你哋依然一樣讓我咁心動。」而有女歌迷自爆三歲時睇小鳳姐個唱，就給小鳳姐送吻，小鳳姐則很識做說：「咁我再錫過你啦！」繼而小鳳再見到手抱的小歌迷又主動「錫錫」：「等你長大之後，我如果仍然可以為你唱歌，係我嘅福氣。」

工作人員上前為小鳳姐整理裙尾。

小鳳姐拎平板電腦與歌迷玩自拍，令現場氣氛高漲。

因小鳳的魚尾裙襬太長，令小鳳姐行得有點「論盡」，裙襬更亂作一團，之後工作人員台上整理時，小鳳姐又顯其搞笑本色：「你哋小心啲，唔好搞到我走光，益咗對面海喎！」引來全場笑聲。

冒雨親近粉絲

另小鳳姐於傍晚在一眾主辦商陪同下在後台進行拜神儀式，小鳳姐步出來即高舉雙手向現場3、40名守候她的歌迷揮手，之後小鳳姐誠心拜神及切燒豬，還嘗了一口燒肉，豎起拇指讚好味。而現場下着細雨，小鳳姐仍冒雨行近歌迷打招呼並說：「我返入去準備啦！」盡顯歌后親民一面。而小鳳姐的魅力吸引圈中好友戚美珍、盧海鵬、劉培基、連炎輝及楊受成夫婦來捧場。

文：音樂組