歐陽妙芝數臭楊崢：係事實！
名模楊崢與無綫小生黃宗澤（Bosco）被爆姊弟戀後，女方負面新聞不絕。昨日與她同期出道的歐陽妙芝爆大鑊，暗示楊崢人緣差，當年搶走大肚黃佩霞男友是「事實」。楊崢對於被指是小三則無奈地稱︰「唔係事實嘅唔回應，當事人已經否認咗。」
Bosco與楊崢被本報踢爆姊弟戀後，楊崢負面新聞不絕！有傳她當年介入大肚黃佩霞與男友戀情，之後又被爆原本Bosco與陳嘉容撻着，最後由楊崢「執二攤」！身為黃佩霞與陳嘉容好友的名模歐陽妙，昨日為nowTV節目擔任嘉賓時爆大鑊，直指楊崢當年搶黃佩霞男友是事實，更稱陳嘉容與Bosco好傾！
歐陽妙芝聲稱與「崢澤」不熟落：「我冇佢（楊崢）電話，你話熟唔熟？（會祝福佢哋？）點都要祝福佢！見到人開心，自己都會開心。」
之後妙芝稱不想提楊崢，怕被外界以為博宣傳。但妙芝又暗寸對楊崢人緣差：「呢排好多講佢哋嘅新聞，聽到唔想聽，見到封面都唔想睇。（楊崢人緣差？）你話呢？我同佢傾過幾句偈都數得出。」
為好姊妹出頭
提到有傳楊崢曾搶走黃佩霞男友，妙芝直指是「事實」：「我當年有陪住佢（黃佩霞），見到個姊妹咁樣，令男人拋妻棄子，可以想像到呢個人係點。（覺得楊崢係第三者？）要問番黃佩霞，講過啦！係事實嚟喎！我尋日（前日）同黃佩霞、伍姑娘食飯又係講佢。（叫Bosco睇定啲？）唔係我責任，要由佢父母同親朋戚友講。」提到Bosco與陳嘉容的緋聞，妙芝稱工作時見過二人「好冧」傾密偈，笑言愛情是控制不到和情難自禁。
其後妙芝再接受訪問，問是否幫好姊妹出頭？她稱：「我係撐姊妹，故事主角好多嘢唔方便講。」
楊崢：唔係事實
對於妙芝的言論，否認「崢澤戀」情變的楊崢於電話訪問中無奈地說：「唔係事實嘅唔回應，當事人（黃佩霞）已經否認咗。」眼見女友被數臭的Bosco則以短訊表示：「我同陳嘉容只係朋友，其他嘢一概唔回應。」提到情變傳聞，他指︰「我都係睇報道先知，畀多啲空間我哋。」問他母親是否詐型？他說︰「連我自己都唔知，見都冇時間見，冇機會『哦』！睇完開心吓笑吓就算。」至於前晚與妙芝食飯的伍詠薇亦「劃清界線」不回應，因她不想牽涉於此事。
文：影視組