祖兒情人節冇禮變滅絕師太

容祖兒昨日在將軍澳電視廣播城為節目《勁歌金曲》錄影，在寒冷天氣下祖兒仍以透視裝示人，果然要靚不要命。提到剛過去的情人節，祖兒表示當日在長沙工作，而男友師兄亦有工作在身，因此二人沒有慶祝，又大爆連小禮物都沒有收到，但沐浴在愛河的祖兒就沒有介意，還Sweet爆表示：「咁多節日，慶祝得幾多吖，日日開心咪得囉！」名副其實日日都是情人節。

影相係要手疊手

新年期間，祖兒和師兄跟一大班朋友聚餐，有朋友將大合照上載到互聯網，相中祖兒和師兄手疊手非常親密，對此祖兒謂：「影相係咁o架啦，咁我哋識o架嘛，冇乜所謂啦。（下次叫朋友唔好公開照片？）唔講得咁多，好掃興嘅，好小問題啫。」

孖Twins反轉橫店

另外，祖兒透露4月將到橫店拍攝一套古裝喜劇，飾演滅絕師太，更會首次與好姊妹Twins合作，相信屆時定必可擦出火花，她說：「反轉橫店呀！希望唔好攪亂個檔攤。」她亦表示希望今年能有更多機會在影發展。

文：影視組