森美捱到躀低新劇半途劈炮
無綫電視劇《使徒行者》正拍得如火如荼，昨卻突爆出主角之一的森美因健康理由辭演，劇組更火速找來馬德鐘頂上。森美接受電話訪問時，直言是自己的缺失，對一直努力為他度期拍攝的無綫深感抱歉：「好對唔住TVB，的確係我嘅缺失！」
原定去年九月開拍的無綫重頭劇《使徒行者》可謂波折重重，先有為遷就答應拍攝的影帝梁家輝時間延期拍攝，但後來家輝卻拍戲斷肋骨迫於辭演，昨又突爆出主角之一的森美同樣因健康理由而辭演。
馬德鐘頂上
森美昨接受電話訪問，透露已拍攝了約10組戲，但最近同時兼顧電台工作、無綫節目主持和多場新年活動司儀，工作量過大令身體支撐不住，他說：「之前捱病咗，發高燒，衡量過自己身體，覺得真係捱唔到，之前都試過捱到病，但今次真係冧咗廠，好少病到咁，好驚影響套戲，怕拖延個進度，有諗過減戲份，但係怕減咗都捱唔到。」
對於劇組已找來馬德鐘頂上，未接獲通知的森美則感到愕然，只稱留待無綫決定。
認影響進度
森美亦多番強調無綫一直努力配合他的時間，從不阻撓他在外接job，因此對自己為劇組帶來的麻煩深感抱歉：「明白佢哋辛苦，成日都諗辦法度我個期，好對唔住TVB，的確係我嘅缺失！」問他怕唔怕有是非？森美說：「如果真係有我都樂意承受，因為係我自己嘅問題。（怕唔怕無綫追究？）我好樂意承擔，我真係影響到拍攝。」
森美好拍檔小儀得知森美辭演無綫新劇，她說：「佢之前係身體唔舒服，發燒感冒，識佢咁多年，佢真係好少因為病而告假，點都會做，佢咁鬼熱愛工作，有機會又爭取，而且佢好鍾意拍劇，今次相信佢真係感覺到身體狀況先會咁。」小儀坦言近日見到森美，都覺得他一臉倦容：「我都有問佢頂唔頂到，佢話又通宵咁囉，我轉頭都問候吓佢。」
文：影視組