周秀娜有權揀對手 吼實金城武

周秀娜昨日到黃埔海旁出席記者會，宣布與蕭定一的中國3D數碼娛樂合作，以2,000萬元酬金接拍12部電影，包括和張智霖合演、葉念琛執導的「港版風月俏佳人」（暫名《千億惡魔愛上我》），以及《3D紫荊俠》等，娜姐經理人Roy及鄭丹瑞等到場支持。

拍床戲冇問題

穿黑色露背高衩裙的娜姐大晒美腿靚背，獲蕭定一安排坐私人遊艇出場，甚有女王風範。蕭定一送模型帆船給娜姐，寓意雙方聯手在影壇乘風破浪。習慣性感示人的娜姐老貓燒鬚，落遊艇時不慎踩裙腳險仆。進行簽約儀式時，她擰轉身簽名露出「側半球」，引來數名男途人駐足眼望望。

晒腿兼露背

金城武靚仔有型，娜姐視他為偶像。（資料圖片）

對於獲賞識簽約狂拍戲，娜姐直言開心：「多得佢哋信任，希望拍到好嘅作品。（滿意片酬？）都好好！最開心係可以同唔同導演合作。（有決定權揀對手同劇本？）會參與吓，一哥咁錫我，會安排好好嘅創作班底。（有壓力？）唔會，係互相信任，票房嘅嘢好難講，我都想有代表作。（想同邊個做對手戲？）我一向鍾意金城武，但慢慢嚟啦！」問她與張智霖的愛情片會否性感演出？她坦言未定細節，要視乎劇情：「會去唔同地方取景，係好夢幻、浪漫嘅愛情故事。（有激情床戲？）信得過佢哋，我冇問題。」

蕭定一送模型帆船給娜姐，寓意在影壇乘風破浪。

娜姐自踩裙腳險仆親。

買車獎勵自己

娜姐稱簽約不等如賣身，仍可為其他公司拍戲。問到合約內容有否限制她不准結婚生仔？娜姐搞笑地說：「結婚可以，但唔畀生仔同拍拖，咁多套戲要拍，我都唔想拍拖住，專心工作先。」至於如何花二千萬酬金？她表示已買了一架Benz名車獎勵自己，再問之後會否買樓？她說：「未住，但一路有睇。」

文：影視組