王浩信體能無敵黃心穎食沙
無綫藝人王浩信（Vincent）及黃心穎昨日到赤柱，拍攝新劇《再戰明天》。劇情講述Vincent為幫心穎操練體能喪做掌上壓，之後興起除剩黑色背心，大晒麒麟臂；心穎睇到目瞪口呆，更被Vincent搞到成面沙。心穎事後笑言：「為咗拍攝效果搞到成面係沙，都在所難免。（覺得辛苦？）唔係吖，我覺得幾好玩！」問到上月踏入25歲的她，早前新春期間性感大露三吋心口事業線賀年，是否大個女決心行性感？她說：「冇特別想行性感，我一路都係做自己，覺得舒服就ＯＫ！」
Vincent則自爆最近冇啖好食：「依家日日操兩個鐘，上咗癮，想keep住身形，食嘢都要清淡，得蛋同菜。（情人節冇得燭光晚餐？）老婆（陳自瑤）同我一齊食沙律，佢本來對大隻佬都冇特別喜好，後來都有讚我身形好睇，原來我老婆都好鍾意『朱古力』（腹肌）。」
