馬詩慧：做父母都想子女開心
對於女兒當街啜爆洋妞，名模馬詩慧（Janet）昨午回覆時語氣平靜說：「做父母都想子女開心，佢哋開心，等如我哋開心，只要佢哋唔係做傷天害理嘅壞事，唔傷害自己健康嘅事。人生苦短，做乜要為啲芝麻綠豆事令自己增添煩惱？如一個人真心真意鍾意自己個女，在我嚟講，男女都冇分別，呢樣嘢係出自我內心。」她說前晚女兒被傳媒追拍時，第一時間用電話向她求救：「我叫佢停低，又冇做錯事，唔使逃走。」回家後女兒並沒有再談起此事。
問到王曼喜的性取向，一向敢言的Janet直言兩、三年前曾經問過女兒，得到的回覆是：「not sure（不清楚）。」Janet說：「佢以往拍拖對象有男有女，嗰個外國好友我都見過，佢嘅朋友即係我嘅朋友。喺呢個階段，你問我佢係咪同性戀者，我唔會話Yes，有啲人係需要啲時間去認識自己嘅方向，好多讀女校嘅都會有咁嘅經歷，覺得有人對我好，好貼身嘅感覺，可能係fall in love，如果問佢，佢唔會話100%係定唔係。（會唔會擔心？）呢啲唔到父母擔心得嚟，我唔想畀壓力佢，如果係真嘅話，我只可以支持佢，如果有人錫佢和關心佢，做父母開心都嚟唔切，唔會理係男定女。」她說與王敏德想法一致，女兒是獨立個體，有揀朋友的自由，故要尊重女兒，她明言並不鼓吹同性戀，只想每個人活得開心。