潮Tee貶值10倍周柏豪誓追究

周柏豪向來是圈中公認的型男一族，是不少年輕人的潮流Icon。去年他為圓老闆夢，終投資七位數在生日當天11月12日成立自家潮流品牌「XPX」，並在網上賣各式各樣的潮物。柏豪除在公開場合做「人肉衣架」將潮Tee着上身外，亦向好友連詩雅、鄭融、Angelababy、余文樂等派衫當宣傳，為谷銷量出盡法寶。

可是人「潮」自然多是非，經常在網絡遇上黑仔事件的柏豪今次再成狙擊目標，內地大型網購平台驚現大量「翻版柏豪牌」，正貨原價699港元的短褲亦只賣88元人民幣（約112元港元），更誇張的是399港元的各款潮Tee，在網上只賤賣29元人民幣（約37元港元），平足十倍有多。而且一班假貨商亦相當專業，不單止37蚊包全國運費，而且承諾兩天內發貨。

Logo已註冊

至於柏豪的一班粉絲即為偶像品牌被冒充而抱不平，但亦有網民在柏豪社交網站Instagram鬧爆品牌毫無設計可言，有火爆網民爆粗留言：「求其撩個大Logo就當設計咗件衫，有冇咁×懶呀」、「點解都係黑白色」、「佩服敢賣高價」等。

對於假貨大量撒網，柏豪昨日接受本報電話訪問時，稱早已得知有冒牌貨充斥市面，並曾主動出擊趕絕冒牌：「其實品牌出咗一個禮拜，都已經有翻版電話殼，一直都知呢件事。公司發現後，都有向翻版商留言話Logo係註冊咗，有啲人驚就刪咗。」為免令不法之徒繼續侵權，柏豪誓言保留追究權利：「會保留追究權利，交畀律師處理，但網上翻版好易做到，好難杜絕。」

假貨質料差

柏豪亦自我安慰指自家品牌有市場才會有冒牌出現，未有介懷，但強調一分錢一分貨：「我上網睇過，假貨啲質料、標籤都做得唔好，始終都要睇個買家想買虛榮心定係質素好嘅貨。（被彈設計簡單？）品牌原意係簡單為主，好多大牌子都係得個大Logo，依家先第一季，遲吓會諗新嘢。」

文：音樂組