許廷鏗處男獻身獨挑羅蘭
人氣歌手許廷鏗（Alfred）未因年頭「挑機」林峯失敗而氣餒，馬年復始已積極儲人氣，待明年再跟前輩爭「最受歡迎男歌星」獎。據知Alfred除繼續發展歌唱事業及當牙醫，亦作填詞、導演及拍劇的新嘗試，務求將各階層粉絲一網打盡，為顯示實力，他在家中大晒在四大頒獎禮上所得的八個獎座，表現風騷。
想形象更入屋
最近Alfred以「處男導」身份為新歌《時光》執拍板，更膽粗粗親邀影后羅蘭擔任女主角夥拍舞台劇演員泰臣拍MV，他說：「我好鍾意羅蘭姐，有次喺活動度斗膽問佢可唔可以做我MV女主角，點知佢一口答應，仲唔理條街有幾污糟都照瞓低，真係好多謝佢為我瞓身演出。」
除執導及填詞外，問他可有其他新嘗試？Alfred直言：「想試吓拍劇，不過唔會挑戰高難度或好激嘅角色，最想可以入到屋，等更多人接受我。」今年狂吸人氣，問他是否為明年「最受歡迎男歌星」獎鋪路？他笑住說：「冇諗呢啲喎，只係想形象更入屋啫。」另外，堪輿學家麥玲玲預測Alfred、鄭俊弘、羅力威及周柏豪馬年運程，她睇好柏豪跑出，而Alfred要「邊行邊走」加倍努力。
文：音樂組