官恩娜化淚為笑恨開個人騷
「華納一姐」官恩娜（Ella）跟同門的周柏豪、連詩雅（Shiga）及樂隊Dear Jane在年初二團拜，之前為撰文言論遭狠批爆喊的Ella，在馬年化淚為笑，望新一年萬事如意。Ella很羨慕今年九月在紅館首度開騷的柏豪說：「我都好想有自己個騷。」除歌癮外，她的戲癮亦一樣大，電視台正重播其八年前舊作，Ella自嘲冇眼睇：「嗰時啲演技好幼嫩，真係八年人事幾翻新，自己都成長好多，睇番以前好似係另外一個人咁。」Ella稱好想再嘗試演戲，電影和電視劇都有興趣。
柏豪行紅地氈
柏豪手捧一桶金望馬年「大豐收」，除9月紅館開騷外，稍後又因其演出的電影會到外地參展，令他有機會一嘗紅地氈滋味，去年音樂成績大躍進的他說：「攞到幾個有分量的獎，都需要繼續增值自己，將氣勢延續，唔好浪費團隊嘅心機。」
Shiga赴台拍戲
Shiga的MV廣受網迷支持，被封為「點擊女王」，Shiga坦言：「係開心嘅，但都會有壓力，盡量唔諗咁多。過年後會赴台拍戲及新歌MV，到時MV出嚟反應係點，會幾多人鍾意自己都控制唔到，當然都想繼續有好成績。」而電影則集港、台、星馬演員，Shiga稱會是演技及國語大挑戰。而Dear Jane農曆新年亦不忘為新碟錄音，四子原來最愛的賀年食品是盆菜，成班人圍住食暖笠笠又笑言：「一於帶個盆菜去錄音室，邊食邊錄幾咁開心。」而今年是Dear Jane組隊10周年，四子希望完成新碟後，有意於年底舉行10周年音樂會作為一個音樂旅程的紀錄。
文：音樂組
攝：司徒國榮