雨僑愛得認真 最冧開朗男
雨僑（Ava）由當初的玉女歌手轉戰影壇，去年共拍了4套電影的她算是在演藝事業中最豐收的一年，亦得到很多時下演員夢寐以求的機會，不過入行5年的她在感情上一直交白卷，極其量只跟羅力威傳緋聞，她覺得另一半是否有才華都是其次，心地好及性格開朗才是最重要的。
1.拍性感戲 拒認玉女
雨僑在2013年共拍了四套電影包括《3D冰封俠》、《猛龍特囧》、《喜愛夜蒲3》，和內地電影《孤島驚魂3》，其中在《夜蒲3》及《猛龍》更擔任女主角，有很多當紅女演員亦未必有如此多機會，她坦言感激伯樂錢國偉。
我真係要好多謝錢國偉，其實《夜蒲》第一、二集佢已經有搵我，不過當時因為尺度同檔期關係最後都傾唔成，今次佢再搵我亦二話不說就答應，因為我覺得導演好有口齒，雖然都有少少犧牲去性感，但係呢個世代肯性感嘅人有好多，而佢一次又一次搵我真係好難得。
至於「玉女」呢個咁肉麻嘅稱呼都係大家畀，我又冇一心話想做玉女，其實做演員從來就係唔錫身，如果玉女係代表好矜貴，辛苦又唔做、電影角色唔啱自己又唔做，其實都好難做啫，娛樂事業就係帶畀人歡樂。
2.陷三角戀 犧牲友誼
《夜蒲3》中的雨僑不乏性感演出，劇情大部分都是講述情侶之間的爾虞我詐，想不到在香港大學生物系畢業，自小在家教甚嚴的環境下長大的雨僑亦曾發生這些「你呃我，我呃你」的愛情電影情節。
我中學嗰陣試過同朋友鍾意埋同一個男仔，不過我哋兩個都唔認，但兩個又私下成日同個男仔聯絡，諗住係自己贏啦，但我最後都輸咗，當時好hurt，真係冇friend做，不過依家佢哋都各自同其他人結咗婚，之後就冇再發生過呢啲事，同埋依家鍾意人係會講、會認。
至於講到性感，因為呢部戲係ⅡB級，性感極都有個地步，當然係需要啲時間同家人溝通，不過家人都係比較關心我喺現場會唔會蝕底，或者係我自己嘅感覺會唔會唔舒服，多過外界點樣睇我。
3.結婚生仔 暫時唔急
十幾歲開始談戀愛的雨僑自覺是對戀情認真的人，入行以來都只跟過羅力威傳緋聞，她更大方承認二人曾同遊日本，不過她只肯以「好朋友」來形容跟羅力威的關係，但她也有想過結婚生仔的人生大事。
緋聞嘅嘢唔使咁多o架喇，我15、6歲就開始拍拖，每一段感情都記得同last得耐，都算係認真嘅人，之後亦可以同個男仔做番朋友，只係有啲去咗外國讀書就冇聯絡。都有諗過結婚生仔，不過點都係30歲過後嘅事，我希望夠時間生3個，有男有女。依家醫學發達，我見楊千嬅都係可以完成晒事業上嘅衝刺再生小朋友都OK，我暫時都唔急。
我希望將來的另一半最緊要係孝順、善良，同埋個人性格開朗，我好驚對住一啲日日愁眉苦臉嘅人，都唔可以太hea，做人要有動力，至於有冇才華就係bonus。
4.搵好前輩 挑戰演技
今年內嘗試了驚慄、武打、愛情、喜劇等角色的雨僑，原來最想挑戰的是能演繹大半生的角色，她十分恨跟好戲之人劉青雲和女神張栢芝合作。
想嘗試由後生演到老嘅角色，同埋同劉青雲合作，一來佢嘅演技好到無與倫比，二來佢好百搭，佢嗰種氣質係所有女演員同佢一齊都會好襯。至於女演員方面其實我自己一直都好鍾意張栢芝，不過佢近呢幾年又減產，要同佢合作就難啲。
後記：大忙人唔願瞓
不要看雨僑外表像個弱不禁風的小女子，其實她目標十分清晰，瓣數多多的她除了拍戲和唱歌外，近年亦創立了自家化妝品牌，平時又在Youtube拍片教人化妝，當所有人都奇怪她如何兼顧時，她就笑說：「瞓少啲囉，要將人哋攤開廿年嘅嘢喺幾年內做晒係自己選擇嘅。」道理從來是簡單，雨僑的而且確是一個唔hea的人！
口述：雨僑
筆錄：影視組
髮型：Jay Yeung
服裝：October 1