任達華拍續集霆鋒女友加盟
任達華為主演新片落力宣傳，竟將拍檔謝霆鋒的緋聞擺上枱，揚言會否開拍續集，則視乎對方新女友是否參演一角。被前輩任達華拿來開玩笑，霆鋒即時露出尷尬表情。
謝霆鋒、任達華、陳偉霆等主演的英皇電影《救火英雄》票房已衝破2589萬港元，老闆楊受成決定兌現承諾，拿100萬獎賞台前幕後！一眾主角昨晚雲集中環戲院謝票，霆鋒更獻出「第一次」，現身本港戲院與粉絲互動，場面熱鬧可想而知。
環保袋裝100萬
問到任達華會否開拍續集時，他竟趁霆鋒未現身，拿對方緋聞開玩笑：「拍唔拍前傳都要睇吓霆鋒有冇新女友一齊演。（佢有女友？同Janice Man拍拖？）嘩……吓……咦……唔知喎。（佢哋襯唔襯？）霆鋒同邊個都襯啦，佢有型又chok。」談到100萬花紅獎金，他就因為日前被停車場收費處拒收1000元紙幣，依然怒氣未消：「叫老闆將100萬變晒做10蚊紙，演員各自帶備環保袋，實行攞得幾多得幾多，1000蚊紙都唔收，10蚊好，10蚊用膠做，一定唔會係假啦。」
女影迷爭住合照
當霆鋒到場時，即被追問拍拖一事，他一再強調自己單身，又指暫不會找女友。再問到與JM被傳因怕戀情曝光，被迫分開行街時，霆鋒謂：「頭先咪答咗你囉，冇呀。（話你喺新加坡用2000萬買樓，氹張栢芝帶小朋友返香港過年？）冇，我哋屋企習慣周圍飛，節日係團聚嘅藉口，活得開心咪得囉，日日都係生日。（嫲嫲會掛住一對孫仔？）唔係，有得見。」問到兩個囝囝是否定期返港時，霆鋒則點頭示意。現場霆鋒被大批女影迷爭相翹手影相，離開時更寸步難行，非常墟冚。
另外，對於近日港產片似乎復甦，霆鋒大感雀躍，並答允將自己的獎金分給其他工作人員，實行「與民同樂」。
文：影視組