城城爆金句恨牛魔王添食
郭富城放下帥哥形象，變身「長角刀疤男」演出新片，又與「宇宙最強」甄子丹激烈對打，拍攝過程可謂苦不堪言，不過他似乎相當享受箇中樂趣，當子丹揚言要「封刀」之際，他卻對開拍續集蠢蠢欲動，又爆出金句：「佢荷包重，我就事業心重，梗係唔同啦。」
城城於星皓投資新片《西遊記之大鬧天宮》內扮演牛魔王，與台灣美女陳喬恩被配成一對，單是角色造型每天要花上超過3小時化妝，更要頭上長角外加刀疤，他竟對這個造型拍案叫絕，又表示開拍前一年甫見造型草圖，已畀5個like。
發哥夠氣派
談到今次角色亦正亦邪，城城似乎相當受落，最難忘是首次與周潤發合作，頭場戲即要對打：「不過唔夠喉，希望嚟緊仲有合作機會啦，總之喺發哥身上學到好多嘢，包括待人處事。佢嘅氣派無人能及，所以我覺得做番自己咪得囉，自己都要對自己有信心嘛。」
啱闔府統請
至於與子丹的連場激戰，單是欣賞預告篇已覺緊張刺激。當被問到誰比較好打，城城笑說：「我以柔制剛，佢武功勁，我舞功都唔差，大銀幕上梗係各有千秋啦。」由於造型及拍攝時間冗長而艱辛，早前記者問到子丹會否答允拍續集，他即耍手兼擰頭，不過城城卻唱反調：「有得開（續集）嘅話點解唔拍呢？佢褲袋同荷包重咗啲，而我就事業心重咗啲，好想多啲工作發揮機會，況且呢個題材係闔府統請嘅。」稍後城城已落實演出一部內地電影，卡士分量相當有瞄頭，但暫未可透露詳情。
文：影視組
攝影：司徒國榮
髮型：Ian Wong@ii salon
化妝：Fannie Chan
服飾：Diesel Black Gold/I.T.
場地：香港銅鑼灣皇冠假日酒店