發哥日食半碗飯 十個月甩30磅
【陳偉立北京直擊】國際巨星周潤發（發哥）日前在北京宣傳期間，特地抽空接受《東網》獨家專訪，上天下地無所不談！「昂藏六呎」58歲的發哥現時只得151磅，身形精悍fit爆，他大方分享「能人所不能」的減肥秘訣，堅持每日只吃半碗飯兼步行至少個半小時，終於十個月內激減30磅，狀態比廿多年前的賭神高進更佳！
神級影帝周潤發縱橫影壇近四十年，戲裏戲外都型到爆，但他仍對身形要求甚高，去年為拍攝電影《賭城風雲》決心於十個月內激減30磅，整個人變得更瀟灑！甚少接受長篇專訪的他日前在北京接受東網專訪，大談減磅妙法及過程。
堅持每日行個半鐘
眼見合作《賭城風雲》的演員謝霆鋒、杜汶澤及內地演員高虎都身形偏瘦，令發哥萌起減磅keep fit念頭，更愈減愈過癮，由最高峰期的180磅減至現時的151磅，比25年前演《賭神》中的高進時還要瘦削，他說：「戲入面成班友都瘦到不得了，整個大肥佬喺度唔係幾夾喎！唔係喇！屋企hea係唔會刺激到你，但有呢啲演員喺度，係無形壓力，令你的起心肝。」發哥認為飲食是最重要一環，他這十個月來飲食清淡，每日只吃一餐，飯量只得半碗，令人吃驚，自認為食貓的發哥表示為了健康盡力忍口，戒油、戒辣、少糖，他笑說：「有人話唔食會暈，暈有時係心魔啫！可以一個月或者一個禮拜放肆一次半次，但到咁上下，你個胃細咗，就唔使食咁多。（食好貴嘅補品？）千祈唔好呀！最好鹹魚青菜呀！愈多呢啲嘢（補品）就愈麻煩，你睇戰前戰後啲人，咁瘦，奀挑鬼命，但成個香港都係佢哋打造出嚟！你話當時有咩好嘢食吖？反而依家點解有三高呢？就係啲人營養豐富，唔做運動，舊時勞動社會啲人冇啖好食，但係健康囉！依家社會富裕咗，但係病痛多！」
向來愛行山的發哥近月養成每日步行的習慣，有傳他每日行六個鐘，他澄清只是周日約到朋友才會花如此多時間，但平日至少行個半小時，由寓所行至尖沙咀再折返動輒十公里，絕對唔嘢小！行慣山的發哥笑言已是較舒服的減磅方法：「行鳳凰山、蚺蛇尖、八仙嶺就會用多啲體力囉！市區行唔覺得辛苦嘅，不過係要堅持。（除咗行山，有冇做gym？）冇，最多都係拉吓筋，因為舊時拍戲傷患多，『筋長一寸，命長十年』呀！」
運動受郭富城啟發
令他堅持運動的，原來是《西遊記之大鬧天宮》的拍檔郭富城，發哥指對方無論多累亦會跑步一小時，大讚犀利：「佢話本身肝炎都好咗，我覺得可以借鏡，某個程度係郭富城啟發咗我！佢靚仔到不得了、又fit，咁鍾意打邊爐都唔肥！」
對於有傳以推拿減磅，發哥表示只因要醫治舊患，提到被外間以「回春」形容，發哥笑說：「唔係回春嘅，只係近排拆散過再鑲番佢，成副偈拆開晒佢，再一part part執番咁。（大家都覺得你愈來愈後生！）感覺上精神咗，自己覺得舒服，就觀眾睇都舒服！」
身體成功搣甩30磅，發哥直言精神比以往好，問到狀態是否可媲美30年前？他說：「體能上始終年紀大，又唔敢做太劇烈運動，但休休閒閒，身體感覺係比30年前好咗，舒服咗輕鬆咗。我18歲開始入TVB，到80、90年代拍好多戲，90年代中期去美國休息咗兩年，之後又不斷拍！依家諗番轉頭，當時冇好好認識同照顧自己身體。（目標想再減幾多呀？）瘦啲好睇啲！但去到咁上下，除非你做劇烈運動先會再瘦，始終有骨架喺度。」