徐子珊美麗遲鈍
愛美是否每個女人的天性？有些人是需要時間培養或受環境因素影響而激發內在的「愛美」基因，徐子珊便屬於後者，她自嘲是遲鈍型，很久才發現自己原來是愛美一族。之後她一直花時間去經營自己獨有的「潮」味，不在乎外間的善意或惡意批評，一切從錯配中學習。
徐子珊自小性格粗豪爽朗，是一個不折不扣的男仔頭，身邊圍繞着的都是好兄弟，她愛波鞋的運動服裝扮，與穿高跟鞋的女性化形象談不上關係，沒想到參選港姐後，改變她一生，發掘了自己女性化的一面。子珊說：「媽咪覺得我太男仔，好似生多咗個仔，想我變得女仔啲，於是提名我參選港姐，可以學吓禮儀，做番個女仔。由面試、參選，當上冠軍，甚至履行港姐職責，都要保持優雅形象，幾乎日日都要高跟鞋示人，由起初冇感覺，變得愈嚟愈愛。」
她回想當初的所謂「慘痛」經歷都忍不住笑了出來：「我從小只對波鞋從一而終，人生第一對高跟鞋係為家姐大學畢業而買，第二對就係買嚟港姐面試，對對只限半吋高，已經係我極限！」她笑言起初穿高跟鞋很不習慣，以嬰兒學行來形容自己：「起初行到好似個機械人，細細步、慢慢行！」
男仔頭變女性化
看到今時今日的子珊，很難想像她昔日的男仔頭造型，直言連自己也估不到今天可以變得那麼女性化，猶如大蛻變：「屋企依家全部都係高跟鞋又或者係oxford shoes，反而冇乜波鞋…又好似一對波鞋都冇喎！總之成件事唔同晒，愛襯skinny jeans，總之no more sportwear！」子珊不知不覺中已變了「心」。
心變了，人也變得時尚，她最愛翻閱時尚雜誌，就連style.com、WWD.com與firstversion.com等時尚網址都不會錯過，為的只是提高個人品味與潮流資訊：「作為公眾人物，舉手投足以至衣着品味都會被注視，我唔係話要做潮人，都唔希望被批評衣着差。」那她心目中的fashion icon又是誰？她說：「Kate Moss（姬摩絲）！佢同我差唔多高，但線條比例好好，而我哋衣着打扮都t好似，都係以舒服為主，有種be yourself嘅穿衣態度。」
夠膽冇嘢冇可能
網購盛行，就連子珊也加入網購大軍，她表示因為工作日夜顛倒，沒時間外出shopping，網購十分方便：「啱晒我哋啲懶人！」她坦言網購這玩意早已盛行於歐美：「歐美仲有郵購方式，定期寄本時裝書嚟，睇啱款式、顏色同size後，寄返張訂單紙就得，呢種購物模式好方便 ，香港就冇咁完善。」
她同樣留意男裝潮流，認為男裝市場潛力龐大：「近年好興unisex，潮流就係冇分男裝定女裝，女人可以着pantsuit同oxford shoes，點解男人唔可以着裙同高跟鞋，只要你夠膽，時裝世界冇嘢話冇可能！」她加以補充：「依家男人比女人更貪靚，更捨得花錢置裝。」
時尚界鮮有死硬派粉絲，都是跟紅頂白的多，至於她今期最愛？她表示Saint Laurent：「Hedi Slimane入主後，風格完全改變，冇咗原有glamorous，但有嘅係中性型格，我好buy！」
恨跨界別合作
徐子珊對時裝有興趣，有否想過加入設計師行列？她說：「當然有興趣，但我會揀做鞋履設計師，主攻設計高跟鞋系列，因為我實在太愛高跟鞋！」她稱高跟鞋能修飾雙腿線條，有效拉長身段比例，令女人變得更sexy！
做鞋履設計師創立同名品牌實在不易，對沒有鞋履創作經驗的她更是天方夜譚，但她仍抱着小小心願望能與品牌跨界別合作，一嘗當女裝鞋履設計師滋味，她更點名想跟Nicholas Kirkwood與Christian Louboutin合作，大讚他們設計出的高跟鞋夠高，卻行得舒服，打趣地笑說：「我最愛向『高』難度挑戰！」
採訪：劉慰思
攝影：司徒國榮
化妝：Raymond Yip
髮型：Zap Tang（中環XENTER）
服裝：Vivienne Westwood
場地：JC CAFE & BAR