Celia K.唔怕做豬扒 繼續明星夢

美好前程 跟我再追尋

經理人Celia（施念慈）同我爭取「Papa」呢個醜角時，我係有抗拒，做豬扒喎！尤其有晚喺中環拍戲，有班老外行過見到我哋成班女演員，即刻吹口哨叫靚女，但一見到我個豬扒樣，即刻：「fxxk！」一聲，真係幾hurt！可能我太醜，拍戲期間，少咗人同我傾偈，同時又見到個個女演員又補妝又照鏡扮靚，真係令我冇乜自信。喺咁冇自信嘅情況下，要用心機做戲，配合劇情扭籮扭腰吸引人，真係幾難o架！

拍呢套戲先識伍詠薇，佢好照顧我，仲同我講：「傻豬！做醜角先至最突出，如果你做唔到，就唔會畀你做啦！要靚？個個都得，但係醜得嚟又要做得好，唔係個個得。」當部戲上映後，我覺得Celia呢個決定真係冇錯！「Papa」拉近我同觀眾距離，反應好好，讚我做得自然，覺得我順眼咗，仲話原來我唔係只識得性感。同時有好多人喺微博私信我，話「Papa」令佢哋好有同感，因為個樣醜，真係唔敢去蒲去玩，甚至擴闊社交圈子，但同時亦鼓勵咗佢哋，就算生得醜，都可以一樣開心。我開始發覺，拍戲唔只係為自己爭取機會，仲可以同觀眾交流，發放正能量。同時我充分感受到，其實一個醜女真係好慘，天生醜真係唔係罪。

Celia坦言介意被人叫「死o靚模」。

幸好得伍詠薇鼓勵，令Celia放膽演醜角。

好多朋友都話我係一隻牛，成日問點解我要咁辛苦？我話做一隻牛起碼有用識耕田，都好過做一隻只係識食識瞓嘅豬！入行六、七年，轉過幾間公司，曾經有人叫我去試鏡拍寫真，不過試足三年都冇被人揀中。點解？當你見到啲女仔拋晒胸又嗲聲嗲氣挨落人度，咁就得咗，而我面試時只係識話好好珍惜機會，對方一句話：「個個都會珍惜o架啦！」咁你咪知道點解囉！久而久之，開始懷疑係咪唔應該再發明星夢！

Celia讚施念慈是稱職的經理人，非常照顧旗下每位藝人。	放大圖片	緋聞不多的Celia，曾與張建聲合作《一路向西》被傳撻着。
當日Celia穿泳衣面試《夜蒲3》，肯搏肯露的她獲選擔任片中一角。

小小苦楚等於激勵

以前做模特兒收入麻麻，我用晒積蓄開咗間指甲舖，諗住靠舖頭嚟支持生活，點知生意唔好，加上當時舊model公司好直接話：「你真係生不逢時，懷才不遇。」即係話我冇機會啦，於是唔做model，指甲舖又執埋，走去做化妝小姐。返工當日，我企喺化妝品櫃枱，頭頂個電視廣告牌，仲播緊我幫另一個牌子拍嘅廣告，當時真係覺得好諷刺。雖然一個月得四日假，每日企十個鐘，但係自信心真係返晒嚟。喺模界自問我唔係最靚最大胸，優秀嘅人太多，我好似永遠唔夠人爭，真係好辛苦！但係做化妝小姐，大家都係平等，只要我努力就得。自問有口才，sell客sell到攞獎，同時又考好多美容證書，當時真係諗住一路做。點知做咗年幾後，搞到喉嚨生繭，惟有辭工，走去台灣讀日式化妝課程。

喺台灣期間，突然間收到Celia電話，話想同我出寫真。當時我覺得，橫掂依家都係零，凡事唔係零就一o架啦，難得有人賞識，決定再博過。好多謝Celia，記得拍床戲時，佢喺現場陪我，仲幫我試位、同導演研究，睇得出佢好緊張，當時仲見佢眼泛淚光，可能見到我着得少布，知我難受。佢唔係推咗我出去拍就算，令我唔會有被離棄嘅感覺，真係好窩心。

逝去感情如何留得住

決定做呢行，唔單止少時間同屋企人相處，仲錯失咗一段感情。以前我有個感情穩定嘅男友，初時佢都好支持我，但係大家圈子唔同，開始令佢諗得多！我成日覺得做完嘢咁攰，點解仲要花時間去解釋？覺得佢應該會明白我。直至有一日，佢話：「我嘅存在會阻住你發展，我願意分手，希望你前途一片光明。當你有一日唔想做呢行，我哋就結婚。」好記得分手當日，一返到屋企我不斷咁喊，反問點解會搞成咁？直至今日，我都想同番佢一齊，但又唔想拖住佢。我唔肯定喺呢行會做幾耐，大家青春有限，唔通我拖住人咩？

我係想出人頭地，就算話我發明星夢都好，只要有夢想，一萬次一億次失敗都好、自尊心冇晒都好，只要好好努力，我相信總有成功一日，到時可以話畀曾經唔認同我嘅人聽：「我係得嘅！」希望有人同我講：「你都可以做戲喎！」 咁就足夠！

後記：其實怕被忘記吧

Celia K.初出道時，曾聽到有人指她是三級女星、死o靚模，當時她會反問自己：「我冇露點喎？你妒忌我呀？」她坦言當時出席活動見記者，猶如布景板沒人認出！她笑言現時出街已多了人認出，記者亦叫得出其名字，令她非常欣喜。

文：蔡穎怡　

攝：樊愛慈